Erekşe qajettılıkterı bar balalar qoǧamnyŋ qoldauyn qajet etedı. Özderın qorşaǧan ortanyŋ kışkentai bır bölşegı retınde sezınu olar üşın asa maŋyzdy. Köptegen ortalyq pen ūiymnyŋ osy mäselege jıtı köŋıl bölıp, äleumettık sūraqpen ainalysuy «erekşe» balalar men ata-analarǧa ümıt syilaidy. Osyndai ortalyqtyŋ bırın astanalyq käsıpker Botagöz SŪLTANOVA aşty, bügınde «Baqytty şaŋyraq» qoǧamdyq qory 2000-nan asa balanyŋ oŋaluyna septesıp keledı.
2019 jyly erekşe qajettılıgı bar balalardy tärbielep otyrǧan jüzdegen ata-anadan tūratyn bastamaşyl top qūryldy. Tūrǧyn üi, järdemaqy sekıldı bırqatar mäselenı kötergen olar äleumettık osal toptan şyqqan qazaqstandyqtarǧa kömektesudı qolǧa aldy. Äleumet müddesı üşın küreskenderdıŋ qatarynda Botagöz Sūltanova bolyp, keiın özı de jeke qor aşudy ūiǧarady. Türlı diagnozy bar balalarǧa qol ūşyn sozyp kele jatqan «Baqytty şaŋyraq» qoǧamdyq qory osylaişa 2020 jyly aşyldy. Elordada 4 jyl qatarynan jūmys ıstep kele jatqan ortalyq eresekter men balalarǧa oŋaltu qyzmetın ūsynyp, erekşe taǧdyry bar 720 otbasynyŋ basyn qosyp otyr. Olarǧa azyq-tülık sebetı, bılım beru qūraldary, käsıpkerlık negızderıne tegın oqytu sekıldı türlı materialdyq, äleumettık, bılım beru jäne psihologiialyq kömek körsetıledı.
«Ortalyqty aşudaǧy basty maqsatym – astanalyq otbasylarǧa demeu bolyp, är bala baqytqa laiyq ekenın sezdıru» degen keiıpkerımız Botagöz Sūltanova – özı de Ädıl esımdı «erekşe» bala tärbielep otyrǧan qaisar ana. 2,5 jasynda onkologiiaǧa şaldyqqan ūlynyŋ em-dom şaralarymen talai jerde jürıp, talai qiyndyqpen kezıkse de, taǧdyr tälkegıne eş moiymady. Jüzu, şet tılın üirenu, baǧdarlamalau sabaqtary men tarih pänın süiıp oqityn Ädıl üşın anasynyŋ qamqorlyǧy men meiırımı – eŋ maŋyzdysy. Sözınşe, anasymen bırge taŋerteŋ jügıru kündı sättı bastauǧa erekşe sezım syilaidy.
«Erekşe bala tärbielep otyrǧan ärbır ata-ananyŋ asyl armany – ūrpaǧyn qaitken künde de oŋaltu, ony aiaqqa tūrǧyzyp, ömırge beiımdeu. Elordadaǧy «Baqytty şaŋyraqtyŋ» är ortalyǧyna keletın ata-ananyŋ tılegı de sol. Ortalyqta BSP, autizm, Daun sindromy jäne jürek talmasy sekıldı diagnozy bar balalar üşın pedagogikalyq tüzetu qarastyrylǧan. Logoped, defektolog, psiholog mamandardyŋ oqytu sabaqtary men psihologiialyq qoldauy ūsynylady. Balalardy oŋaltyp qana qoimai, ata-analardy da äleumet ömırıne etene aralasuǧa şaqyramyz. Şyny kerek, mūndai otbasylarmen jūmys ısteu qiyn. Ümıtı üzılıp, jeterıne jete almai, tauy şaǧylyp, jıgerı ügılıp jatatyndar bar. Materialdyq jaǧdaiy tömen otbasylardy qoldauda ata-analarǧa jūmysqa tūru mümkındıgı berıledı. Odan bölek, qordyŋ basty mındetı – zaŋnamalyq deŋgeide mümkındıgı şekteulı balalar men ata-anasynyŋ qūqyǧyn aiqyndau. Tūrǧyn üimen qamtamasyz etıp, berıletın järdemaqy mölşerın ūlǧaitu üşın memlekettık organdarmen ünemı bailanysta bolyp, öz müddemızdı qorǧaudan şarşaǧan emespız. Sondai-aq qoǧamda balalardy densaulyǧyna qarai bölıp qarau bar. Menıŋşe, är adam bırdei mümkındık pen qūqyqqa ie. Būl mäselenı şeşude bız ata-analarmen ūiysa otyryp, teŋ qūqyq üşın küresıp kelemız» dep bölıstı B.Sūltanova.
Keiıpkerımızdıŋ bastamasy arqasynda qazırde Astanada «Baqytty otbasy» baǧdarlamasymen myŋdaǧan otbasynyŋ tūrǧyn üi aluǧa bailanysty ötınışı maqūldandy. Būl – «Baqytty şaŋyraqtyŋ» bır ǧana jemısı. Ortalyqta köp ata-ananyŋ alǧysyn alyp, otbasylardyŋ bır-bırımen aralas-qūralasyp, 800-dei «erekşe» balany qamtyp, jüzdegen balanyŋ qūrdastar qataryna qosyluyna sebepker bolǧan Botagöz Sūltanova üşın balasy bar üi – baqytty şaŋyraq.
