Elordada bastapqy medisinalyq-sanitarlyq kömek körsetu jüiesı damyp keledı. Osy rette «Üidegı därıger» jobasynyŋ mümkındıkterı aitarlyqtai. Jobaǧa säikes tūrǧyn üilerdıŋ bırınşı qabatynda ornalasqan şaǧyn därıgerlık ambulatoriialar jūmys ısteitın bolady.
Jaŋa jobanyŋ bır erekşelıgı – oǧan arnaiy jer uchaskesın bölu, klinikany salu men jabdyqtauǧa biudjettık şyǧyndar qajet emes. Ambulatoriiany aşu jeke investisiia esebınen jüzege asyrylady. Ötken jyly osyndai 8 ambulatoriia aşyldy. Qala qūrylysynyŋ ösu qarqyny men josparlaryn eskere otyryp, äkımdık 2023 jylǧa deiın BMSK jelısın damytu josparyn bekıttı. Oǧan säikes qosymşa 51 därıgerlık ambulatoriia aşylatyn bolady. Jaŋa qyzmettıŋ jaiyn bılmek bolyp, Astana äkımdıgınıŋ №4 qalalyq emhana şaruaşylyq jürgızu qūqyǧyndaǧy memlekettık kommunaldyq käsıpornynyŋ №6 otbasylyq densaulyq ortalyǧyna bardyq.
Köp qabatty üidıŋ tömengı qabatynda ornalasqan jinaqy jaidyŋ tabaldyryǧyn attaǧan sätten-aq ülken emhanalardaǧy qarbalas, qai därıgerge baru kerek dep jan-jaǧyŋa alaqtaityn ädettegıdei ahualdy körmedık. Şaǧyn ärı typ-tynyş. Bır-ekılı kısıler esık aldyndaǧy üilestıruşıden kelgen jūmysynyŋ jaiyn anyqtap, dälızdegı jaily oryndyqtarǧa jaiǧasyp, därıgerge kezegın kütıp otyr. Osy ortalyqtyŋ meŋgeruşısı Ūlbala Ömırälieva 200-den astam şarşy metrde ornalasqan ambulatoriianyŋ kündelıktı jūmysymen tanystyrdy.
– Soŋǧy kezde äkımdık tarapynan köp män berılıp otyrǧan mūndai ambulatoriialardyŋ artyqşylyǧy baryn ısımızben däleldep otyrmyz. Jaqyn aimaqta ornalasqan köp päterlı üilerdıŋ tūrǧyndaryna qyzmet etemız. Osy künı bızde tırkelgen jetı myŋ adamnyŋ 2300-ı – balalar. Künıne ekı auysymda 80-100 adamǧa därıgerlık qyzmet körsetıledı. Eresekter balalarymen bırge kelıp, bır mezette därıgerge qaralyp, keŋes alady. Basy auyryp, jüregı syzdasa, aldymen jedel järdemdı emes, bızdı şaqyratyn boldy. Osynda jūmys ısteitın tört därıgerdıŋ bailanys telefondary – tūrǧyndardyŋ qoldarynda. Özımızde tırkelgen aiaǧy auyr äielderdıŋ bärıne ortaq «chat» aşyp, olardyŋ kündelıktı köŋıl küiın baqylap otyrmyz. Bala düniege kelıp jatsa, aldymen bız baramyz. Osydan-aq otbasynyŋ bır müşesıne, senımdı körşısıne ainaldyq, – dedı ortalyq meŋgeruşısı.
Jasyratyny joq, emhanaǧa barudyŋ, onda kezekke tūrudy, beitanys därıgerdıŋ şarşaŋqy türın oilaǧanda, därıgerge körınudıŋ özı «beinetke» ainalady. Sodan da auyra qalǧanda emhanany ainalyp ötemız. Üide bar därını ışe salamyz. Osylaişa öz densaulyǧymyzǧa salǧyrt qarauǧa mäjbürmız. Al şaǧyn ambulatoriianyŋ erekşelıgı – därıgerge jūmysqa bara jatyp ta soǧa ketıp, qan qysymyn tekserıp, aǧzadaǧy qant mölşerın de anyqtap, jürek soǧysyn da tyŋdatyp ülgeremız. Taiaq tastam jerdegı emhanaǧa jyldam jetıp, tez körınıp, kerek şipagerdıŋ keŋesın alyp, jarty jüikesı jūqarmai, ärı qarai emdelıp ketuge de zor mümkındık.
– Alty aidyŋ kölemınde halyqtyŋ jedel järdem şaqyrtuyn azaittyq. Jiı kezdesetın infarkt, insultten bolatyn ölımnıŋ azaiuyna äserımız bar. Qalai deseŋız, tūrǧyndar aldymen bızge habarlasady. Jaqyn jerden jetıp baryp, nauqastyŋ jaiyn bılemız. Qajet bolsa ǧana jedel järdem şaqyrtamyz. Al nauqastyŋ dertı qaterlı bolsa nyşandarynan bırden bılıp, infarkt, insult ortalyqtaryna tıkelei jetkızudı tabystap, jedel järdemnıŋ auruǧa böletın uaqytyn qysqartamyz. Mūndai kezde alǧaşqy saǧattar adam ömırıne araşa bolady. Osylaişa halyqtyŋ medisinalyq mekemelerge degen közqarasyn, därıgerge qaralu mädenietın özgertıp, qyzmet sapasyn köterıp jatyrmyz, – dep oiyn tüiındedı därıger.
