– Memleket basşysy Qasym-Jomart Toqaevtyŋ «Syndarly qoǧamdyq dialog – Qazaqstannyŋ tūraqtylyǧy men örkendeuınıŋ negızı» atty halqymyzǧa arnaǧan Joldauynda elımızdıŋ eŋ bır kökeitestı mäselelerı tereŋ sipattalǧan. Äsırese, «Halyq ünıne qūlaq asatyn memleket» tūjyrymdamasyn ıske asyru – bärımızge ortaq mındet ekenı jaqsy aitylǧan.
Är halyq üşın jerden qasiettı dünie joq. Prezident osy Joldauda jūrtşylyqty tolǧandyryp jürgen jer mäselesıne arnaiy toqtalyp: «Memleket basşysy retınde taǧy da mälımdeimın: jerımız şeteldıkterge satylmaidy. Oǧan jol berılmeidı» dedı. Osy parasatty tolǧam el köŋılınen şyqty dep oilaimyn. Sondai-aq Qasym-Jomart Kemelūlynyŋ «Qazaq tılınıŋ memlekettık tıl retındegı rölı küşeiıp, ūltaralyq qatynas tılıne ainalatyn kezeŋı keldı dep esepteimın» dep aitqany öte qūptarlyq. Osy tūrǧydan kelgende, aldaǧy jyly Altyn ordanyŋ 750 jyldyǧyn, äl-Farabidıŋ 1 150 jyldyq, Abai atamyzdyŋ 175 jyldyǧyn atap ötu ūlt tarihyn tügendeuge aitarlyqtai serpın berdı.
Osy jerde bır ūsynysymdy aita ketsem deimın. Ana tılımızdıŋ bailyǧy, bar qazynasy körkem ädebietımızde jatyr. Sondyqtan qazaq klassikterınıŋ jüz şyǧarmasyn mektep baǧdarlamasyna engızıp, joǧary oqu oryndaryna da mındettı türde oqytu qajet. Öitkenı elımızdegı är adamnyŋ intellektualdyq mädenietın qalyptastyruǧa, ruhani damytuǧa män berıluı kerek. Kez kelgen mekeme basşysyna halyqtyŋ tarihy men tılın, dästürın jetık bıletın, parasatty azamattar ırıktelıp taǧaiyndalsa deimın. Äitpese, Hakım Abai atamyz aitqan «keseldı qular» köbeiıp kettı.
Joldauda bılım salasyna qatysty da bıraz mäseleler qamtylǧan. Qala men auyl mektepterı arasyndaǧy orta bılım salasynyŋ alşaqtap bara jatqany, auyldyq jerlerdegı bılıktı pedagogtardyŋ tapşylyǧy sekıldı problemalar – menıŋ de janyma batady. Ǧylym salasyna da erekşe nazar audarylǧany menı quantyp otyr. Şyn mänınde, ǧylym damymai, memlekettıŋ alǧa jüruı qiyn. Bärı – bır-bırımen sabaqtasyp jatqan dünieler. Sonymen qatar mädeniet qyzmetkerlerın qoldauǧa da köŋıl bölınıptı. Şyndyǧynda, elımızdegı kıtaphana, muzei salasynyŋ mamandarynyŋ jalaqysy öte mardymsyz. Qazır bızde «kıtaphana, jataqhana, därıhana» degen ūqsas ataular jiı kezdesedı. Köne ündı jūrtynda kıtaphanany «Danalyq üi» dep ataǧan. Bızge de kıtaphanany osylai atauǧa bolady.
Halqymyz «Auyl – altyn besık» dep beker aitpaǧan. Prezident öz Joldauynda auyldy körkeitu jaiynda da salmaqty oilar qozǧaǧan. Sodan keiın auyl, audan, qala ekonomikalyq tūrǧydan derbes bolu kerek degenı de köŋılge qonady. Är eldı meken öz mäselesın özı şeşkenı jön. Sondai-aq otbasy jäne bala tärbiesı, medisinalyq qyzmet, äleumettık kömek, turizm, şaǧyn jäne orta biznes sekıldı özektı mäseleler jan-jaqty saralanǧan. Qoryta kelgende, Memleket basşysynyŋ Joldauy elımızdıŋ odan ärı damu baǧytyn körsetıp berdı dep aituǧa bolady.
