«Bozoq» tarihi-mädeni muzei qoryǧynyŋ ūiymdastyruymen Altyn Ordanyŋ 750 jyldyǧyna arnalǧan «Ūly dala mūrasy» atty ǧylymi-täjıribelık seminar öttı.
Jiynda Joşy ūlysynyŋ Qazaq handyǧyn qūrudaǧy tarihi sabaqtastyǧy, halyqaralyq turizmdı damytu üşın elımızdıŋ tarihi-mädeni mūrasyn saqtau jäne nasihattau mäselelerı talqylandy.
Seminardyŋ aşyluynda söz alǧan QR Mädeniet jäne sport ministrlıgınıŋ Mädeniet jäne öner ısterı jönındegı departamentınıŋ direktory Kümıs Seiıtova Memleket basşysy Qasym-Jomart Toqaevtyŋ qyrküiektegı Qazaqstan halqyna arnaǧan Joldauynda Altyn Ordanyŋ 750 jyldyǧyn atap ötuge erekşe maŋyz berılıp otyrǧandyǧyn jetkızıp, būl basqosu – sol auqymdy şaranyŋ basy dep esepteimın dedı.
«Bozoq» tarihi-mädeni muzei qoryǧynyŋ direktory Säule Burbaeva da Altyn Orda turaly salmaqty oi qozǧady.
– Şyn mänınde, Qazaq jūrty – Altyn Ordanyŋ tıkelei mūragerı sanalady. Altyn Orda nemese Joşy ūlysy Euraziia aimaǧynda ömır sürgen quatty memleket boldy. Osy aimaqta ornalasqan elder Joşy ūlysynyŋ äserın bastan ötkerdı. Altyn Orda türlı halyqtardyŋ mädenietın bırıktırıp, ony joǧary deŋgeige jetkızdı. Qazanda Altyn Ordanyŋ 750 jyldyǧyna arnalǧan halyqaralyq forum öttı. Körşı qyrǧyz elınıŋ astanasy Bışkekte körme aşyldy. Biylǧy mamyrda Parijde Türkı akademiiasy IýNESKO-men bırlesıp, forum ötkızdı. Bızde de būl aituly kün –Qazaqstan Prezidentınıŋ tapsyrmasymen memlekettık deŋgeide atap ötıledı, – dei kelıp, elordanyŋ ırgesındegı «Bozaq» şaharynyŋ tarihy men jospary jaiynda aityp öttı. «Bozaq» qalasynyŋ ırgeles aumaǧyna tarihi-mädeni park salynady. Onda ǧylymi jäne şyǧarmaşylyq jobalardy jüzege asyratyn alaŋ bolady. Sondai-aq köne şahar – innovasiialyq joba retınde eldıŋ turistık kartasyndaǧy mädeni ortalyqqa ainalady» dedı ol.
Al H. Dosmūhamedov atyndaǧy Atyrau memlekettık universitetınıŋ professory Köpjasar Meŋdıgereev Reseidıŋ Astrahan oblysynda Altyn Ordaǧa arnalǧan muzei bar ekendıgın aitty.
«Men ony osydan 20 jyl būryn körgem. Astrahan oblysy Qarabaily audanynda Altyn Ordanyŋ bileuşısı Batu han Alaş Ordasyn tıkken jerge – aspan astyndaǧy muzei jasap qoiǧan. Mūrajaidyŋ kompoziiasiiasy erekşe köz tartady. Hannyŋ saraiy, kütuşılerge arnalǧan oryn, monşa, at bailaityn kerme – qysqasy, sol däuırdegı körınıstı köz aldyŋyzǧa äkeledı. Orta ǧasyrdaǧy jädıgerlerge de bai» deidı ǧalym.
Sonymen qatar seminarda respublikanyŋ är öŋırınen kelgen ǧalymdar öz baiandamalarynda Altyn Orda men Joşy ūlysy turaly tarihi derekterge toqtaldy. Keibır tarihşylar bız de orta ǧasyr tarihyn zertteitın mamandar tapşy ekendıgın aityp, soǧan jastardy baulu kerek dedı.
Berık ŞÄMŞIKENOV
