«Nauryz aiy tuǧanda, toi boluşy edı būl maŋda» dep aqiyq Mūqaǧali aqyn jyrlaǧandai, elordanyŋ törı sanalǧan «Qazaq elı» monumentı janynda 21-22 nauryzda Ūlystyŋ ūly merekesı köktemdei jai-darly köŋıl-küide toilandy.
«Toi degende qu bas domalaidy» degen atamyz qazaq. Arqanyŋ alai-dülei ūitqyp soqqan borany men qaqaǧan aiazynan arylǧan jūrtşylyq köktemnıŋ jyly lep şaşqan altyn säulesımen şuaqtap, Nauryz merekesın tamaşalauǧa molynan jinaldy.
Jūmyrtqadai sap tüzegen aq boz üilerdı körgende jailauǧa endı köşıp kelıp, märe-säre bolyp jatqan qazaq auylynyŋ beinesı köz aldymyzǧa keldı. Altybaqanda ūlttyq kiım kigen jastar äueletıp än şyrqady. Astana qalalyq filarmoniiasynyŋ Halyq aspaptar orkestrınıŋ önerpazdary kümbırletıp küi töktı. Belgılı estrada änşısı Aigül İmanbaeva halyqty nazdy änderımen ädemı äserge böledı. Elordalyqtarǧa jaqsy tanys aǧaiyndy Jügınısovter de tyŋdarmandaryn täntı ettı. Taǧy basqa el tanyǧan änşıler de köpşılıktıŋ köŋılın köterdı.
Äsırese, merekede ūlttyq oiyndar bairaǧy jelbıredı. Küşterı tasyp, atoilaǧan jıgıtterdıŋ namysy qozdy. Bala künımızde tübın tüsırıp oinaǧan asyq atu saiysynyŋ maŋaiyna üiırılgen jetkınşekterdıŋ qarasy mol boldy. Tıptı, ülkenderdıŋ de delebesı qozyp, balalarmen teŋ tūryp jarysqa tüstı. Balalyqtyŋ bazarynan alystaǧannan berı asyq atudy saǧynyp qalyppyz. Qatysuşylarmen bırge bız de saqamyzdy şyrq üiırıp, nysana közdedık. Keiıngı jyldary şetkerılep qalǧan asyq oiyndarynyŋ jandanyp kele jatqany jürekke jylulyq ūialatady. Būl baǧytta «Asyq atu» ūlttyq federasiiasy täp-täuır jūmys atqaryp jür.
Kır tasyn köteru saiysynda kıleŋ som bılektıler küş synasty. Bırınen-bırı ötken saiypqyrandardyŋ önerıne jiylǧan qauym riza boldy. Olar auyr kır tasyn qinalmai köterıp, basynan asyryp jatty. Būla küşı tasyǧan jıgıtterdıŋ bärı de saiyn dalany eren küşterımen taŋǧaldyrǧan Qajymūqan men Baluan Şolaqtyŋ ūrpaqtary ekendıgın tanytty. Qūryş bılektı jıgıtter de qol kürestırıp, merekenıŋ mereiın asyrdy. Arqan tartys bäsekesı de toidyŋ körkın aşty.
Şara barysynda nemerelerın qydyrtyp, daladaǧy qyzyqtardy tamaşalap jürgen ülken kısılermen tıldestık. Bärı de aqjarma tılekterın bıldırdı.
– Nauryzdy asyǧa kütemın. Bızdıŋ bala künımızde äke-şeşemız toilaityn. Köje pısırıp, qystan qalǧan sürdı qazanǧa salatyn. Jasy ülken qariialar bata beretın. Keiın osyndai tamaşa meiramdy joǧaltyp aldyq. Özım Atbasar qalasynda tuyp östım. Qazır Ūlystyŋ ūly künın otbasymyzben atap ötemız. Bäibışem nauryz köje pısırıp, balalarym men nemerelerıme däm tatqyzamyz. Bügıngı mereke qatty ūnap jatyr. Kün de şyrailanyp tūr. Jaŋa jylymyz elımızge baqyt, bereke äkelsın dep tıleimın, – deidı Arystan Mūratov esımdı aqsaqal.
«Ainalaiyn, men alys auyldan balalaryma qydyryp kelıp, Nauryz merekesın tamaşalap jürmın.
Qazaqtyŋ baiyrǧy salt-dästürı qaita jandanyp jatyr. Quanyştymyn. Ūlystyŋ ūly künı degen – ǧajaiyp meiram ǧoi. Kün men tün teŋeledı. Nauryzben bırge köktem kelıp, köŋılımız de jadyrap qaldy. Ūly merekemız halqymyzǧa jaqsylyq alyp kelsın» deidı Qaneş Ysqaqqyzy degen anamyz.
Ūzyn sözdıŋ qysqasy, Ūlystyŋ ūly künın elordalyq aǧaiyndar jaima-şuaq peiılmen qarsy alyp, bır-bırımen qauyşa qūşaqtasyp, ūlttyq ǧūryptarymyzdy därıptei bıldı.
Azamat Esenjol
