Qazır elımızde on bır ūlttyq mereke jäne jiyrmadan astam käsıbi mereke men atauly künder bar. Qūdaiǧa şükır, toi men quanyştan kende emespız. Qūrsaqqa bıtken künımızden bastap, qartaiǧanşa toilap, dumandatuǧa sebepterımız de az emes. Dästürlısı bar, syrttan kelıp jatqan mereke, salttar bar – jalpy toişyl halyq ekenımız ras.
Bıraq 1 nauryz – alǧys aitu künı bızge osy bır «dumanşyl» mınezdı qoia tūryp, ūstamdyraq bolǧan jarasatyn sekıldı. Onyŋ mänısın tüsınu üşın, merekenıŋ tarihyna üŋılu jetkılıktı.
2015 jyldyŋ säuır aiynda Qazaqstan halqy assambleiasynyŋ HHII sessiiasynda Nūrsūltan Nazarbaev sonau Stalin tūsynda älemnıŋ är tükpırınen türlı ūlt, ūlys ökılderı öz yrqynsyz jer audarylyp, elımızge köşıp kelgenın eske aldy. «Olardy mäjbürlep vagondarǧa otyrǧyzyp alyp kelıp, auyldarǧa tastap kete berdı. Olardyŋ eş düniesı bolǧan joq. Sol uaqytta būl dalada özderı mūqtaj bola otyrsa da, qazaq halqy kelımsekterdı özderınıŋ saman üilerıne kırgızdı. Bır şatyrdy bölısıp bırge tūrdy. Bır üzım nanyna deiın bölıp jedı» dedı…
Sonymen, Qazaqstan halqy assambleiasy qūrylǧan 1 nauryz elımızde «Alǧys aitu künı» bolyp belgılendı. Būl merekenıŋ AQŞ pen Kanadadaǧy 1621 jyly aǧylşyn kolonisterı bastaǧan Alǧys aitu (Thanksgiving Day) künımen mändes ekenı anyq edı.
«Būl künı eldegı barlyq etnostar bır-bırıne meiırbandyq tanytyp, kezınde syrttan kelgen adamdardy öz tuǧanyndai qabyldaǧan qazaqtarǧa alǧys aitu künı retınde atap ötu ädılettı bolar edı» degende de Elbasy osy mereke qūrau-qūrau etnostardy qazaq memlekettılıgınıŋ ortaq müddesıne bırıktırıp, halyqty būrynǧydan da jaqyndastyra tüsetınıne sengen.
2016 jyldan berı elımızde osy mereke atap ötılıp kele jatyr.
Bıraq, būl toida «törde otyruǧa» tiıs qazaq körıngen qaraǧa elpektep, merekenı atap ötude özgelerdıŋ aldyna tüsıp alyp, soŋynda bosaǧada otyra beruge beiıl bolyp tūr.
Jūrt Alǧys aitu künımen bır-bırın qūttyqtap, merekenıŋ mänın qaşyryp jatyr. Eldıŋ quanǧanyna qarap quansaq ta, «toişyl» mınezımız turaly oilap, säl «mūŋaidyq».
Är närsege sana ölşemımen qarasaq qoi!
Ūstamdyraq bolaiyqşy!
