Bas qala mektepterındegı «Elorda Aqparat» serıktestıgı qyzmetkerlerınıŋ «Mektep jäne mediasauattylyq» taqyrybyndaǧy kezektı kezdesuı №38 mektep-liseiınde öttı. Serıktestıktıŋ jobasy aiasynda ötken basqosuda oquşylar «Astana aqşamy» gazetınıŋ jurnalisterıne özderın tolǧandyrǧan saualdaryn qoidy, qalam ūstaǧan aǧa-apalary bar bılgenımen, jiǧan-tergenımen bölıstı.
Būl mekteptıŋ basqa oqu ordalarynan bır erekşelıgı – tärbiesı, bılımı erekşe, dästürı qalyptasqan, ata-analar qalanyŋ basqa bölıgıne köşıp ketse de, balalaryn osy mektepke tasidy eken. Bulling, basqa da keleŋsızdıkter köbeigen zamanda ata-analardyŋ ornyqty oqu ordasyna senım artuy tüsınıktı. Arasynda şyǧarmaşylyqpen ainalysatyn, söz önerıne, jurnalistikaǧa jaqyn oquşylardyŋ saualdary da qyzyqty boldy. «Jurnalist bolu oŋai ma, ne üşın osy mamandyqty taŋdadyŋyz?», «Jurnalistikanyŋ bolaşaǧy qandai?» degen saualdarǧa gazettıŋ şef-redaktory Tölen Tıleubai, mobilograf Jansaia Täŋırqūl men osy joldardyŋ avtory jaŋa media turaly, mediasauattylyqqa, mamandyqtyŋ qyr-syryna qatysty jan-jaqty jauap berdı.
«Jurnalist bolǧanyŋyzǧa ökınbeisız be?», «Aqşa üşın material jazǧan kezıŋız boldy ma?» dep sūraǧan Farizanyŋ saualyna «Astana aqşamy» gazetınıŋ şoluşysy Amanǧali Qaljanov tolymdy jauap berdı.
«Ūltqa qajettı dünielerdı jazuǧa tyrysamyn. Öz ūltymnyŋ maqsat-müddesıne qaişy keletın närsenı jazbaq tügıl, oiyma da alǧan emespın. Aitaqqa eretın, aqşaǧa jazatyn jurnalister – bır top ta, memlekettık saiasatty jazatyn ärıptester – bır top, olardyŋ arasynda salmaqty dünieler jazatyn qalamdastarymyz bar. Maǧan oqyrmanǧa küizelıs äkelgen aqparattan görı adamǧa quanyş syilaityn, adamǧa kün siiaqty säule şaşatyn nūrly dünieler ūnaidy» dedı ol.
Jaqsy sūraq qoiǧan Farizaǧa Tölen Tıleubai qoltaŋbasymen kıtabyn syilap, 25 qazan – Respublika künı qarsaŋynda ötetın, Astananyŋ 25 jyldyǧyna arnalǧan oquşylar arasyndaǧy «El jüregı – elorda» atty şyǧarmalar baiqauyna qatysuǧa şaqyrdy, jurnalisterdı jyly qabyldaǧan mektep äkımşılıgıne, direktory Qadyrqazy Mūqanovqa alǧysyn aitty.
Kezdesudı tüiındegen mektep-lisei direktorynyŋ orynbasary Aigül Saǧitova qolynan smartfony tüspeitın, gazet-jurnal men kıtapty sirek oqityn jaŋa zaman jastary – Z buynyna söz önerı men jurnalistika jaily qūndy mälımetter berıp, arnaiy uaqyt bölıp kelgen qalamgerlerge şynaiy alǧysyn bıldırıp, talapty oquşylarmen şyǧarmaşylyq bailanys jasau jönınde ūsynys jasady.
1999 jyly aşylǧan, Aqmola Astana atanǧaly ziialy qauym ökılderı balalaryn aparǧan, eskı bolsa da, eŋsesı biık mektep bılım sapasy jönınen aldyŋǧylar qatarynda. 2013 jyly qala mektepterı arasynda «Köşbasşy» ataǧyn ielengen, qazır mūnda 2257 oquşy bılım alady. Eŋ alǧaş direktor bolǧan Jamal Qasymbek atynda pedagogikalyq şeberlık kabinetı bar. Onda mekteptıŋ jetıstıkterı, oquşylar men mūǧalımderdıŋ alǧan marapattary jinaqtalǧan. Sondai-aq 2009 jyly aşylǧan mūǧalımderdıŋ jetekşılıgımen oquşylardyŋ qolymen jasalǧan qolöner būiymdarynyŋ körmesı taŋǧaldyrdy. Onda aǧaştan oiu oiyp, tüiın tüigen, suret salǧan, qaǧazdan, matadan neşe türlı būiym jasaǧan oquşylardyŋ tuyndylaryn körıp, tamsanyp qaittyq. Ekı auysymmen oqityn oqu ordasynda qazır jalpy oquşylarmen bırge oqityn inkliuzivtı bılım alatyn jiyrma şaqty mümkındıgı şekteulı bala bar. Olardyŋ arasynda önerge talpynǧan, ǧylymǧa jaŋalyq qosqan, respublikalyq «Zerde» baiqauynan oryn alǧan Asyljan Raiymbekqyzy sekıldı talantty balalar bar.
Aldaǧy uaqytta mektep äkımşılıgı, būiyrsa, Alaşorda qairatkerı, qazaqtan şyqqan tūŋǧyş matematik Älımhan Ermekovtıŋ atyn beru jönınde respublikalyq onomastika komissiiasynyŋ şeşımın kütıp otyr.
