Astanada naşaqorlyqtyŋ taraluyna qarsy «Täueldılıktı sportqa aiyrbasta» aksiiasy kezektı ret öttı. Is-şara elordanyŋ Almaty audany äkımdıgınıŋ, qalalyq Dene şynyqtyru jäne sport basqarmasy, Polisiia departamentınıŋ esırtkı qylmysyna qarsy küres basqarmasy jäne Jastar saiasaty mäselelerı basqarmasynyŋ qoldauymen ūiymdastyryldy.
Aksiia aiasynda astanalyq sportşylar qala tūrǧyndaryna elektrondy temekını sporttyq qūral-jabdyqtarǧa aiyrbastaudy ūsyndy. Solardyŋ qatarynda elordanyŋ Jastar mäslihatynyŋ deputaty, qazaqstandyq sportşylar odaǧynyŋ müşesı Nariman Seken boldy.
«Astana qalasy äkımdıgınıŋ qoldauymen qoǧamdyq maŋyzy zor aksiia ötkızıldı. Onyŋ aiasynda bız temekı jäne veip şegetın jastarǧa qoldaryndaǧy ziiandy zattardy boks qolǧabyna, tennis jiyntyqtaryna, basqa da jabdyqtarǧa aiyrbastaudy ūsyndyq. Osylaişa, bız elordalyqtardy salauatty ömır saltyna şaqyra otyryp, denı sau ūrpaq qalyptastyruǧa atsalysamyz» dedı sportşy.
Is-şaranyŋ ūiymdastyruşylar tarapy retınde «Astana jastary» jastar resurstyq ortalyǧynyŋ NEET sanatyndaǧy jastarmen jūmys bölımınıŋ mamany Sūltan Ömırǧaliev mūndai bastamalardyŋ maŋyzdylyǧyn atap ötıp, jastardy sportpen ainalysuǧa şaqyrdy.
«Memleket basşysy Qasym-Jomart Toqaev Ūlttyq qūryltaidyŋ üşınşı otyrysynda esırtkı men qazaqstandyqtardyŋ densaulyǧyna ziiandy basqa da zattardyŋ qauıp-qaterı turaly aitty. Sonyŋ negızınde bırqatar keşendı jūmystar jürgızılude. Osy aksiia aryly bız jastardy sportpen şūǧyldanu, densaulyqtaryna köŋıl bölu keregın körsetıp, dūrys jolǧa salǧymyz keledı» dedı maman.
