Elordadaǧy «Jastar» teatrynda Spectrum halyqaralyq mektebınıŋ ūiymdastyruymen World Scholar’s Cup pänaralyq olimpiadasynyŋ halyqaralyq deŋgeiı bastaldy. 20-ǧa juyq elden kelgen oquşylar aldaǧy tört kün boiy türlı akademiialyq saiystarda baq synaidy. Nūr-Sūltan qalasynda ötıp jatqan olimpiadanyŋ halyqaralyq deŋgeiıne Ortalyq Aziia, Europa, Ündıstan, Päkıstan jäne basqa da elderden jalpy sany 215 bılımpaz qatysuda.
Atalǧan şaranyŋ ūiymdastyruşylary mūndai basqosu oquşylardyŋ bır-bırımen jaqyn tanysyp, älemnıŋ är qiyrynan özıne dostar tabuyna ülken mümkındık beredı deidı. «Bügın Nūr-Sūltan qalasyna World Scholar’s Cup pänaralyq olimpiadasynyŋ halyqaralyq deŋgeiın ötkızu üşın jinalyp otyrmyz. Qatysuşylar älemnıŋ tükpır-tükpırınen kelgendıkten, oquşylarǧa öz dästürlerın körsetuge mol mümkındık qarastyrylǧan. Bılımpazdardyŋ bır-bırınen üirenerı de köp degen oidamyn. Oman jäne Keniia sekıldı alystan kelgen qatysuşylarymyz bar. Ortalyq Aziia men Europa, Ündıstan men Päkıstannan da köptegen oquşylar keldı. Būl – türlı memleketter men dästürlerdıŋ bailanysy. Naqty sany 215 qatysuşy bar. Būl jiyn – oquşylardyŋ bır-bırın tanuyna, älemde dos tabuyna ülken mümkındık» dedı olimpiadanyŋ ūiymdastyruşysy Jozef Uillard Har.
Olimpiadanyŋ aşylu saltanaty barysynda sahnadaǧy ülken oryndyqtan bastap ainalanyŋ barlyǧy ülkendı-kışılı oryndyqpen tolǧanyn aŋǧardyq. Osydan-aq halyqaralyq deŋgeidıŋ basty elementı, taqyryby oryndyq ekenın tüsınuge bolady. Jauabyn ūiymdastyruşylardan sūrap kördık. «World Scholar’s Cup olimpiadasy barysynda köptegen eldı araladyq. Türlı qyzyqty dästürge kuä boldyq. Alaida bız elemeitın dünieler jeterlık. Tıptı adamdardyŋ özı kündelıktı bır-bırıne zer salyp, maŋyz berıp qaramaidy. Oryndyq – qarapaiym zat. Künde otyratyn oryndyqqa da zer salyp qarai bermeimız. Būl – tek mysal ǧana. Ülken ısterdı atqaru üşın kışkentai dünielerdı de qaperde ūstaǧan jön» dedı ūiymdastyruşylar.
Oquşylar tüskı astan keiın arnaiy avtobustarǧa otyryp, «Jetısu» saiabaǧyna jol tartty. Saiabaqta arnaiy ūiymdastyrylǧan oiyndar oinap, bırınşı kündı qorytyndylady. Elordany aralaǧan oquşylardyŋ alǧan äserı ūşan-teŋız. Bız olardyŋ bırqataryn sözge tarttyq. Solardyŋ bırı – oŋtüstıkkoreialyq Iýngjun Mun. «Esımım Youngjiun Moon. Oŋtüstık Koreiada düniege keldım. Qazır Astanadaǧy QSI halyqaralyq mektebınde oqimyn. Bügıngı World Scholar’s Cup Global Round öte qyzyqty ötıp jatyr. Ärtürlı elderden kelgen dostarymyzben baǧa jetpes täjıribe almasyp, qyzyqty dästürlermen tanysudamyz. Eŋ ūnaǧany – top bolyp jūmys jasau. Däl qazır fleşmob ūiymdastyryp jatyrmyz» dedı 13 jasar qatysuşy.
Oquşylar avtobustan tüse sala top bolyp suretke tüsıp, qyzyqty fleşmobtar ūiymdastyruǧa kırısıp kettı. «World Scholar’s Cup-qa alǧaş ret qatysyp otyrmyn. Pänderge daiyndaluǧa ūzaq uaqyt kettı. Baǧdarlamalar kürdelı bolsa da qyzyq. Özıme ūnap jatyr. Qazaqstan öte qonaqjai el eken. Aua raiy da tamyljyp tūr» dedı Keniiadan kelgen qatysuşy Amani Njuguna.
Taǧy bır qatysuşy Aiaulym Tükentegı Angliiadan kelıptı. «Angliiada düniege keldım. Astanadaǧy Haileybury halyqaralyq mektebınde oqimyn. Bügın Nūr-Sūltan qalasyndaǧy World Scholar’s Cup Global Round 2019-ǧa qatysyp jatyrmyz. Būl – bızge berılgen ülken mümkındık. Sonymen qatar, osy jarysqa qatysu üşın ūzaq daiyndaldyq. Köptegen elderden dos taptyq. Barlyq qatysuşylar üşın taptyrmas täjıribe dep aitar edım» dedı 13 jasar qatysuşy.
Olimpiadanyŋ ekınşı künı Nūr-Sūltandaǧy Bılım Orda HQQ-na qatysty Spectrum halyqaralyq mektebınde jalǧasatyn bolady.
