Memleket basşysy Qasym-Jomart Toqaev Slovakiianyŋ Syrtqy jäne europalyq ıster ministrı İvan Korchokty qabyldady. Kezdesu barysynda sauda-ekonomikalyq jäne investisiialyq yntymaqtastyqty nyǧaituǧa baǧyttalǧan Qazaqstan-Slovakiia qatynastarynyŋ perspektivalary talqylandy. Sondai-aq Auǧanstandaǧy jaǧdaidy tūraqtandyruǧa qatysty aimaqtyq qauıpsızdık mäselelerı qarastyryldy.
Qasym-Jomart Toqaev İvan Korchoktyŋ Qazaqstanǧa saparynyŋ maŋyzdylyǧyna toqtalyp, būl kezdesu ekıjaqty yntymaqtastyqty damytuǧa tyŋ serpın beretının atap öttı. «Sızdıŋ saparyŋyz Qazaqstandaǧy tarihi dataǧa säikes kelıp otyr. Ekı aidan keiın el Täuelsızdıgınıŋ 30 jyldyǧyn atap ötemız. Kelesı jyly Slovakiia da osyndai tarihi mejege jetedı. 2019 jyly bız Bratislavada elşılık aştyq. Būl bızdıŋ köptegen baǧyt boiynşa tyǧyz yntymaqtastyq ornatuǧa beiıldı ekenımızdı körsetedı» dedı Memleket basşysy.
Prezident ministrge Qazaqstanda COVID-19 ındetıne qarsy küres boiynşa qabyldanǧan şaralar, Auǧanstandaǧy jaǧdaidy tūraqtandyru men osy elge körsetılıp jatqan gumanitarlyq kömek turaly aitty.
İvan Korchok Qasym-Jomart Toqaevqa kezdesuge mümkındık bergenı üşın rizaşylyǧyn bıldırıp, kele jatqan täuelsızdık mereitoiymen qūttyqtady.
Ministr Prezidenttıŋ Qazaqstandy jaŋǧyrtu ısındegı köşbasşylyq qabıletın, halyqtyŋ äl-auqatyn arttyrudaǧy jäne memlekettıŋ qauıpsızdıgın nyǧaitudaǧy eŋbegın Slovakiia basşylyǧy joǧary baǧalaitynyn jetkızdı.
Kezdesu soŋynda Qasym-Jomart Toqaev Slovakiia basşysy Zuzana Chaputovaǧa sälemın joldap, onyŋ kelesı jyly Qazaqstanǧa saparmen keletınıne ümıttenetının aitty.
