Qasym-Jomart Toqaev Joǧary euraziialyq ekonomikalyq keŋestıŋ kezektı otyrysyna beinebailanys rejimınde qatysty.
Sammitke Qazaqstan Prezidentınen basqa Qyrǧyz Respublikasynyŋ Prezidentı – JEEK töraǧasy Sadyr Japarov, Armeniianyŋ Premer-ministrı Nikol Paşinian, Belarus Prezidentı Aleksandr Lukaşenko, Resei Prezidentı Vladimir Putin, Euraziialyq ekonomikalyq odaq janyndaǧy baqylauşy memleketterdıŋ basşylary: Kuba Prezidentı Migel Dias-Kanel jäne Özbekstan Prezidentı Şavkat Mirziioev, sondai-aq Euraziialyq ekonomikalyq komissiia alqasynyŋ töraǧasy Mihail Miasnikovich qatysty.
Qazaqstan Prezidentı öz sözınde Euraziialyq ekonomikalyq odaqqa müşe memleketterdıŋ jahandyq jäne aimaqtyq syn-qaterler jaǧdaiynda özara küş bırıktıre otyryp, äleumettık-ekonomikalyq kedergılerdı sättı eŋseretının, makroekonomikalyq tūraqtylyq pen ösım qarqynyn qamtamasyz etetının atap öttı.
– Odaqtyŋ jūmysy bastalǧan uaqyttan berı Qazaqstannyŋ özara sauda-sattyq körsetkışı 33 paiyzǧa, al eksporty 55 paiyzǧa artty. Qazaqstanda 15 myŋnan astam bırlesken käsıporyn jūmys ısteidı. Olardyŋ sany artyp keledı. Būl – quanarlyq jait. Atalǧan körsetkışter bızdıŋ integrasiialyq yqpaldastyǧymyzdyŋ tabystylyǧyn körsetedı. Ortaq küş-jıgerımızdıŋ aldaǧy uaqytta da azamattarymyzdyŋ igılıgı jolyndaǧy sauda-ekonomikalyq yntymaqtastyqtyŋ qarqynyn damytuǧa baǧyttalǧany maŋyzdy dep sanaimyn. Mūny jahandyq syn-qaterler aldyndaǧy bızdıŋ «ūjymdyq immunitetımızdı» nyǧaitudyŋ kepılı dep bılemın, – dedı Qasym-Jomart Toqaev.
Prezidenttıŋ pıkırınşe, bügınde baiqalyp otyrǧan sanksiialyq qaişylyqtar şyn mänınde būryn-soŋdy bolmaǧan.
– Biylǧy aqpan aiynda elordada ötken Euraziialyq ükımetaralyq keŋes aiasynda «euraziialyq bestıkke» kıretın elder ekonomikasynyŋ ornyqtylyǧyn qamtamasyz etu üşın Joǧary deŋgeidegı Jūmys tobyn qūrudy ūsyndym. Jūmys toby qūryldy. Jedel şaralar toptamasy äzırlenıp, jüzege asyrylyp jatyr. Naqty nätijeler de bar. Bıraq kürdelı geosaiasi ahualdyŋ älı de jalǧasatynyn este ūstau qajet. Būǧan daiyn boluymyz kerek, – dedı Memleket basşysy.
Qasym-Jomart Toqaev keŋes qatysuşylaryna qazırgı jaǧdailar men integrasiialyq bırıgu üderısıne sai keletın Qazaqstannyŋ ekı maŋyzdy bastamasyn qarastyrudy ūsyndy.
– Maŋyzdy jobalar men naqty nätijeler kerek. Būl üşın Euraziialyq ekonomikalyq odaqqa müşe memleketterdıŋ bırlesken jobalaryn tezırek aiaqtau qajet, sondai-aq jaŋa investisiialyq jobalar ūsynu kerek. Aimaqtyq jäne jahandyq bäsekege qabılettılıktı qamtamasyz ete otyryp, biznes salasyndaǧy yqpaldastyqty küşeitu, transqūrlyqtyq dälızderımızdıŋ jyldamdyǧyn jetıldıru qajet. Sanksiialardy eskere otyryp, şeteldık kompaniialardyŋ basqa jerge köşuı üşın qolaily jaǧdai jasau mäselesıne airyqşa nazar audarudy ūsynamyn. Älemdık alpauyt elder de Euraziialyq ekonomikalyq odaqqa müşe memleketterdıŋ geoekonomikalyq ornalasu jaǧynan basymdyqqa ie ekenın jaqsy bıledı. Sondyqtan 180 million tūtynuşysy bar naryǧymyzdyŋ äleuetın elemeu mümkın emes. Atalǧan şaralardy 12 aidyŋ ışınde jüzege asyrudy ūsynamyn, – dedı Qazaqstan Prezidentı.
Memleket basşysy būl jūmystardy Joǧary deŋgeidegı Jūmys toby aiasynda Euraziialyq ekonomikalyq komissiia alqasynyŋ salalyq müşe – ministrınıŋ töraǧalyǧymen atqaruǧa bolady dep sanaidy. Jūmys tobynyŋ aralyq baiandamasyn osy jyldyŋ jeltoqsan aiynda qarastyru ūsynyldy.
– Qazırgıdei kürdelı kezeŋde üşınşı eldermen, integrasiialyq bırlestıktermen ekonomikalyq yntymaqtastyqty keŋeitu jäne tereŋdetu mäselesı özektı bolyp otyr. Būl jönınde byltyr qazan aiynda ötken Joǧary keŋestıŋ otyrysynda aittym. Qazaqstan Euraziialyq ekonomikalyq odaq organdaryna töraǧalyq etken kezde osy baǧyt basymdyq retınde aiqyndaldy. Ötken jyldyŋ soŋynda Şanhai yntymaqtastyq ūiymymen özara tüsınıstık turaly memorandumǧa qol qoiyldy. Tez arada jūmysty qolǧa alyp, naqty jobalar men bastamalardy talqylaudy bastau kerek. Bügın bız İndoneziiamen erkın sauda turaly kelısımge kelu jönınde kelıssözdı bastaimyz. Ündıstanmen kelıssöz jürgızılıp jatyr, Moŋǧoliiamen kelısım pysyqtalu satysynda, – dedı Qasym-Jomart Toqaev.
Prezidenttıŋ aituynşa, qazırgı jaǧdaida atalǧan baǧyttyŋ özektılıgı arta tüspek. Memleket basşysy Komissiia men Ükımetterdı atalǧan jūmysty jedeldetuge şaqyrdy.
– Keşe bırınşı Euraziialyq ekonomikalyq forum öttı. Onda özektı mäseleler men olardy şeşu joldary talqylandy. Euraziialyq integrasiiany odan ärı damytu jönınde pıkır almastyq. Tabysty bolǧan osy ekı künde qol jetkızılgen uaǧdalastyqtar men şeşımder bızdıŋ bırıgu üderısımızdı odan ary damytu aiasynda jalǧasyn tabatynyna senımdımın, – dep Memleket basşysy sözın tüiındedı.
