Jaqynda belgılı qalamger, QR Prezidentınıŋ būqaralyq aqparat qūraldary salasyndaǧy syilyǧynyŋ laureaty, Qazaqstan Jurnalister akademiiasynyŋ akademigı, professor, qazaq baspasözınıŋ bılıktı ūiymdastyruşylarynyŋ bırı, keşegı Alaş arystarynyŋ altyn tūiaǧyndai bolǧan ardaqty azamat Jūmabek Omarūly Kenjalin jaiynda «Serke sözdıŋ sardary» degen estelık kıtap jaryq kördı.
Būl jinaqty qūrastyrǧan marqūm aǧamyzben jaqyn syilas, dos köŋılde bolǧan belgılı jurnalist Marat Toqaşbaev. Kıtapqa adal jürektı azamattyŋ ardager aǧalary, bır sapta jürgen qalamdas dostary, şäkırtterı jäne ını-qaryndastarynyŋ estelıkterı jinaqtalǧan.
Jūmabek aǧamyz özınıŋ tuǧan jerı Torǧaidan şyqqan tūǧyrly tūlǧalardyŋ jolyn alǧa jalǧaǧan azamat edı. Sanaly ǧūmyrynda qalamgerlık pen qairatkerlıktı qatar ūstady. Qarymdy qalamger ömırınıŋ soŋǧy künderıne deiın öz qolymen qūrǧan «Qazaq gazetterı» serıktestıgın basqardy. Irgelı ūjymdy aiaǧynan tık tūrǧyzuǧa bar küşın jūmsady. El ömırınen syr tolǧaǧan tamaşa dünieler jazdy. Soŋǧy jaryq körgen kıtaptarynyŋ bırı – «Er Jäuke mınbegenmen altyn taqqa» dep ataldy. Aqtaŋger aqyn Nūrhan Ahmetbekovtıŋ «Qarǧa ūry» dastanynda aitylatyn äigılı Tölek Jäuke batyr ǧoi. Kenesary hannyŋ senımdı serıkterınıŋ bırı bolǧan. Būl kısı osyndai eren tūlǧanyŋ ūrpaǧy edı.
Jinaqtaǧy ärbır estelıkten parasatty tūlǧanyŋ bekzat bolmysyn, dosqa berıktıgın, bauyrǧa qamqorlyǧyn, jarǧa adaldyǧyn, ärıpteske ädılettılıgın, balalaryna abzal äke bolǧandyǧyn bılesız. «Abyroily bolu oŋai şarua emes. Oǧan ie bolu üşın alǧyr mınez de, şynaiy tazalyq ta kerek. Osy tūlǧalyq mınezdemelerdıŋ bärı Jūmabekte bar edı, öitkenı ol ärısınde tarihymyzda türkı düniesı törınen laiyqty oryn alǧan Ahmet Baitūrsynov, Mırjaqyp Dulatov syndy alaş alyptary negızın qalaǧan qazaq jurnalistikasynyŋ ary da, abyroiy da bola bılgen aǧa buyn danalardyŋ elıne degen ızgı eŋbekterınen, jazyp ta, aityp ta ketken ılımderınen mol susyndaǧan edı» dep jazady jaqyn aǧasy, akademik Äbdısaǧit Tätıǧūlov. Al kurstas dosy Qali Särsenbai «Onyŋ tabiǧatyna sal-serılık tän edı. Qolyna qoŋyr dombyrasyn alyp, oǧan qoŋyr dausyn qosyp, arasynda qoŋyr äŋgımesın aitqanda ol otyrǧan jer jaryq bolyp ketetın. Keide oilaimyn, osy bızdıŋ Jūmekeŋ özın önerge arnaǧanda bır biıkke şyǧarma edı? Sonau studenttık jyldardan berı qūlaǧymyzda qalǧan, aragıdık otyrystarda bärımız qosylyp şyrqaityn, kursymyzdyŋ «mahabbat gimnındei» bolǧan «Aq aru – Ainūrym» änı onyŋ jürek jyry, asyl jary Älimaǧa degen şynaiy mahabbatynyŋ belgısı edı» dep syr şertedı.
Mıne, estelıkter osylai örıle beredı. Qysqasy, būl kıtapty keŋ jürektı azamatqa zamandastary ornatqan eskertkış dep aituǧa bolady.
