Keşe elordadaǧy Täuelsızdık saraiynda UNWTO-nyŋ «Aqyldy qalalar – aqyldy destinasiialar» atty VIII jahandyq sammitı bastaldy. Üş künge sozylatyn halyqaralyq jiynǧa 700-den asa meiman qatysuda. Olardyŋ qatarynda şeteldık tanymal käsıpkerler, säuletşıler, jurnalister men turistık ūiymdardyŋ ökılderı bar. UNWTO-nyŋ qalalyq turizm mäselelerıne arnalǧan 8-sammitı «aqyldy» qalalardy damytu, olardyŋ bügıngı taŋdaǧy kürdelı qalalyq problemalardy şeşuge yqpaly jönınde bolmaq. Öitkenı mūndai mäsele älemdegı köptegen destinasiialardy alaŋdatyp otyr.
Alqaly jiynda qalalyq basqarudyŋ ornyqtylyǧy, qoljetımdılıgı, innovasiialar men tehnologiialar siiaqty maŋyzdy mäseleler aşyq talqylanady. Nelıkten būl sammittı ötkızuge Nūr-Sūltan qalasy taŋdaldy? Sebebı Qazaqstannyŋ bas qalasy «aqyldy» qalanyŋ alǧaşqy tehnologiialaryn sätımen qoldanysqa engızdı. Mysaly, gadjetterdı quattauǧa mümkındık beretın jyly aialdamalar, kün batareialary men velotūraqtar – osynyŋ dälelı. Būdan basqa da jaŋa tehnologiialar elordada qoldanyluda.
Būl sammit bızge ne beredı? Qazır Jer şaryndaǧy halyqtyŋ jartysynan köbı qalalarda ömır süredı. 2050 jylǧa qarai älemdegı qalalarda tūratyn adamdardyŋ sany 2,5 mlrd-qa ösedı degen boljam bar. Alaida qalalar köbeigen saiyn, ondaǧy halyqtyŋ tūrmysynyŋ sapasyna äser etetın närseler de ūlǧaiuda. Mūndai jaǧdaida tek «aqyldy» qalalar ǧana kömekke keledı. Sonyŋ ışınde qalany örkendetuge turizmnıŋ qosatyn ülesı ūşan-teŋız. Qazaqstan siiaqty qarqyndy damu jolyna tüsken memleket üşın turizm ekonomikanyŋ qozǧauşy küşı ǧana emes, sondai-aq elımızdı älemdık qauymdastyqqa tanytudyŋ tura joly.
Būl oraida jahandyq deŋgeidegı basqosudyŋ ötkızıluı elımızdegı qalalardyŋ zamanaui jäne tehnologiialyq jaŋaruyna jaǧymdy äserın tigızıp qana qoimai, bas qalamyz – Nūr-Sūltannyŋ turisterge tartymdy destinasiia retınde kelbetın özgertedı. Sonymen qatar, şeteldık qonaqtar turistık salany damytudyŋ ozyq täjıribesımen bölısedı. Alqaly jiynda Qazaqstan jäne qatysuşy-elder arasynda tiıstı deklarasiiaǧa qol qoiylady. Demek, būl jiyn bızdıŋ mamandarymyz ben şeteldıkterdıŋ ıskerlık jäne serıktestık qarym-qatynastaryn keŋeituge mümkındık beredı.
Eŋ bastysy, qalalyq turizm jönındegı UNWTO-nyŋ 8-şı jahandyq sammitın ötkızu elordamyzdyŋ bedelıne jaǧymdy yqpal etedı. Bas qalamyz Qazaqstannyŋ mädeni, ruhani, ıskerlık ortalyǧy ekenın taǧy bır märte däleldeidı. Al şeteldık meimandar qazaq halqynyŋ bai tarihymen, ozyq mädenietımen, ǧajaiyp salt-dästürlerımen tanysady. Eldı, ūltty älemge tanytuǧa tamaşa mümkındık tuady.
