Meningit meŋdep barady. Jyl basynan berı 13 adamnan aiyryldyq. Soǧan qaramai, elımızdıŋ bas därıgerı Eljan Bırtanov: «Ahual tūraqty jäne halyqty jappai egudıŋ keregı joq» dep jaibaraqattyqpen mälımdedı. Aq halattylar ındet deuge asyǧar emes. Düniejüzılık densaulyq saqtau ūiymy alapat aurudyŋ aldyn alu üşın jylyna 100 myŋ adamnyŋ ışınen 10 nauqas tırkelse, meningitke qarsy jappai egu jürgızudı eskertken. Mūndai elderge joǧary deŋgeide epidemiologiialyq baqylau ornatylady eken. Bız bolsaq älı beiqambyz. Köz jūmǧan jandardyŋ sanyn aitudan ärıge barmadyq. Nege būlai?
Köŋılge medeu bolatyny, düiım eldı şoşytqan aurudyŋ aldyn aluǧa Ükımet basşysy men Senat töraǧasy da qatty alaŋdauşylyq bıldırdı. Premer-ministr Baqytjan Saǧyntaev auruhanalar jūmysynda kemşılık köptıgın jasyrǧan joq. «Talǧardaǧy balany Almatynyŋ auruhanasyna nege aparmaǧan? Talǧardan Qaskeleŋge deiın – ekı saǧattyq jol. Eger būl äkımderdıŋ ısı bolsa, kemşılık jıbergen. Kez kelgen auruhana meningitpen auyrǧan adamdy qabyldauy tiıs» dedı ol Ükımet otyrysynda. Ükımet basşysy respublikalyq ştabtyŋ jūmysy aşyq emestıgın, halyqqa dūrys aqparat uaqytynda jetpegenın synǧa aldy. «Sız Almatyǧa arnaiy baryp, halyqqa özıŋız tüsındırıŋız. Jaǧdaidy közıŋızben körıŋız!» dep eskerttı ministrge. Baqytjan Saǧyntaev ekpenıŋ qūny bır oblysta – 20 myŋ, al ekınşısınde 40 myŋ tūratynyna taŋdanysyn jetkızdı.
Densaulyq saqtau ministrı Eljan Bırtanov elımızde jyl basynan berı meningokokk infeksiiasyn jūqtyrdy degen küdıkpen 593 adam därıgerge kelıp, onyŋ 213-ı auruhanaǧa tüskenın baiandady. Auru 58 nauqastan rastalǧan, sonyŋ ışınde 21-ı – 14 jasqa deiıngı balalar. 2013-tıŋ tek 10-y ǧana jazylyp şyqsa, 55-ı älı em-dom aluda. Al ömırmen qoş aitysqan 13 adamnyŋ 4-euı – Almaty oblysy, 6-uy – Almaty qalasy, 2-uı – Oŋtüstık Qazaqstan, 1-euı Qyzylorda oblysynda tırkelgen. Almaty qalasynyŋ özınde ǧana 2,5 mln adam tūratynyn eskersek, megapoliste karantin jariialau kerek! Aita ketelık, Senat töraǧasy Qasym-Jomart Toqaev ta qūzyrly ministrlıktıŋ ıs-qimylyna köŋılı tolmaitynyn aşyq aitty. «Meningitke qatysty ahualǧa berılgen baǧa qabyldanbaidy. Jauapty ministrlıktıŋ tym jaibaraqattyǧy, tartynşaqtyǧy keşırılmeidı. Senat deputattary Ükımetke saual joldaidy» dep jazdy ol «Tvitterdegı» jazbasynda.
Läzzat ERALİEVA, S.Asfendiiarov atyndaǧy Qazaq ūlttyq medisinalyq universitetı balalar infeksiiasy kafedrasynyŋ professory:
– Bız joldaǧy jelıkpelerdı apat bolǧan surettermen, şylymqorlardy temekı qorabyndaǧy qorqynyşty körınıstermen qorqytamyz ǧoi. Meningitke şaldyqqan adamdardy nege solai körsetpeimız? Sebebı būl – öte qorqynyşty auru. Kündız sap-sau jürgen bala bırneşe saǧattan keiın qaitys boluy mümkın. Asqynǧan derttıŋ adamǧa äkeletın azabyn aitudyŋ özı qasıret. Ol adamnyŋ aiaq-qoly ıstemei, aqyl-esı kemıp, mylqau bolyp qalady. Sondyqtan är därıgerdıŋ mındetı – halyqqa der kezınde aqparat beru, saqtandyru.
