Astanada qala äkımdıgınıŋ qoldauymen üş künge jalǧasqan muzyka maitalmany, Qazaqstannyŋ eŋbek sıŋırgen qairatkerı, «Parasat» ordenınıŋ iegerı, professor Aitqali Jaiymov atyndaǧy respublikalyq I dirijerler baiqauy marapattau räsımı jäne gala-konsertpen tüiındeldı.
E.Rahmadiev atyndaǧy Memlekettık akademiialyq filarmoniiasy qazaq orkestrınıŋ körkemdık jetekşısı-bas dirijerı Aitqali Tılepqaliūlynyŋ 75 jas mereitoiyna arnalǧan būl baiqaudyŋ qorytyndy keşınde qalalyq Mädeniet basqarmasynyŋ basşysy Sanat Şapaşov qala äkımı Altai Kölgınovtıŋ qūttyqtauyn oqyp berdı.
– Qūrmettı Aitqali Tılepqaliūly! Sızdı 75 jas mereitoiyŋyzben jäne respublikalyq deŋgeidegı alǧaşqy baiqauyŋyzben şyn jürekten qūttyqtaimyn! Sızdıŋ ūlttyq jäne älemdık mädeniet pen önerdıŋ eŋ jaqsy dästürlerın jaŋǧyrtu, damytu jolyndaǧy eŋbegıŋız zor. Talantty oryndauşylardy qoldau, käsıbi şeberlıkterın arttyru maqsatynda ūiymdastyrylǧan būl baiqau qatysuşylar üşın ülken mektep boldy. Būl tek bastamasy bolyp, aldaǧy uaqytta da örelı önerıŋızdı halyq igılıgı jolynda jūmsai beruıŋızge tılektespın, – delıngen qala äkımınıŋ qūttyqtauynda.
Sondai-aq Atyrau oblysynyŋ äkımı Serık Şäpkenovtıŋ qūttyqtauy oqyldy. Älşekei Bektıbaiūly atyndaǧy dästürlı önerdı damytu qoǧamdyq qorynyŋ prezidentı Oŋǧarbai Dänebekov mereitoiy iesıne «Älşekei Bektıbaiūly» tösbelgısın tapsyrdy.
Baiqauǧa barlyǧy Astana qalasynan jäne elımızdıŋ basqa da qalalarynan kelgen 11 jas dirijer qatysty. Marapattau barysynda mesenat Sapar Ahmetjanov taǧaiyndaǧan syilyqtar tapsyryldy. Qūrmanǧazy atyndaǧy Qazaq akademiialyq ūlttyq halyq aspaptar orkestrınıŋ ärtısı Azamat Şnarov (Almaty) jäne Ükılı Ybyrai atyndaǧy Aqmola oblystyq filarmoniiasynyŋ Kenjebek Kümısbekov atyndaǧy qazaq halyq aspaptar orkestrınıŋ dirijerı Janat Räşit (Kökşetau) baiqau diplomanttary atandy. Üşınşı oryndy Miruet Mūqanova (Almaty) jäne Äbılqaiyr Saǧymbaev (Qaraǧandy) ielendı. Ekınşı oryndy Ädılet Azbaev (Astana), bırınşı oryndy N.Tılendiev atyndaǧy Memlekettık akademiialyq «Otyrar sazy» folklorlyq-etnografiialyq orkestrınıŋ ärtısı Äbılqaiyrhan Beisekov (Almaty) aldy. Al bas jüldenı Dina Nūrpeiısova atyndaǧy akademiialyq qazaq halyq aspaptar orkestrınıŋ bas dirijerı-körkemdık jetekşısı Bolat Doldaşov (Atyrau) jeŋıp aldy. Baiqau barysynda Aitqali Jaiymovtyŋ «Ereuıl atqa er salmai» şyǧarmasyn üzdık oryndaǧany üşın Miruet Mūqanova arnaiy diplommen marapattaldy.
Gala-konsertte Qazaqstan jäne Tatarstannyŋ halyq ärtısı Nūrjamal Üsenbaeva bastaǧan filarmoniia önerpazdary, baiqauǧa qatysuşy dirijerler men qazylar alqasynyŋ müşelerı qazaq orkestrımen öner körsettı.
