Ūlystyŋ ūly künı – äz Nauryz merekesı qarsaŋynda «Qazaqstan» ūlttyq arnasy qaiyrly ıs jasap, «Qazaqstan» konsert zalynda taǧdyrdyŋ tauqymetıne ūşyraǧan jandarǧa kömek beru maqsatynda efirge jol tartqan «Jan jyluy» baǧdarlamasynyŋ 5 jyldyǧyn baǧdarlama keiıpkerlerımen bırge atap öttı.
Osy uaqyt aralyǧynda baǧdarlamanyŋ sep boluymen 20 jetım bala otbasyly boldy, 13 bala şetelde em alyp, aman-esen elge oraldy, baspanaly boludy armandap jürgen segız otbasy armandaryna qol jetkızdı. Qaiyrymdylyq konsertınde «Jan jyluy» şuaq syilaǧan baǧdarlamanyŋ bırqatar keiıpkerı kelıp, jaǧdailarynyŋ oŋaluyna järdem bergen jandarǧa şeksız alǧystaryn jetkızdı. Körermenderdıŋ nazaryna jüregı bar adamdy bei-jai qaldyrmaityn beinekörınıster ūsynyldy. Konsertke jinalǧandar ol kadrlar arqyly toǧyz taǧdyrdyŋ keşegı almaǧaiyp künderınen habar aldy.
Didar Qaiypov esımdı azamat tepse temır üzetın şaǧynda qaiǧyly jaǧdaiǧa tap boldy. Jūmysynda jürgende denesınıŋ 80 paiyzyn küiık şalǧan onyŋ ömırın därıgerler aman alyp qalsa da, bır aiaǧyn kesıp tastauǧa mäjbür bolypty. Sodan auruhanada jatqan azamattyŋ bar armany aiaqqa tūryp ketu edı. «Jan jyluy» baǧdarlamasynda ol turaly siujet körgen jūrt şama-şarqynşa kömek qolyn sozypty. Maira Iliiasova bastaǧan änşıler qaiyrymdylyq konsertın ötkızdı. Sonyŋ nätijesınde Didarǧa protez salynyp, ol būrynǧydai jügırıp ketpese de, ekı aiaǧyn basyp jüre alatyn boldy. Jıgıt sahnaǧa öz aiaǧymen köterıldı.
Ramazan Esmaǧambetov pen Arujan esımdı säbilerdıŋ dertterı ūqsas. Tuǧandarynan osteogenez, iaǧni süiek synǧyştyq auruyna şaldyqqan olarǧa artyq qozǧaludyŋ özı qauıptı ıs edı. Süiegınıŋ elu ret synǧanynyŋ kesırınen Ramazannyŋ boiy da öspei qalypty. Qaiyrymdy jandardyŋ kömegımen olarǧa tiıstı em-dom jasaldy. Arujan Mäskeude emdeldı. Aurulary erte eseitken balalar qazır bolaşaqqa ümıtpen qaraidy. Ramazan öskende aqyn bolǧysy kelse, Arujan sot bolamyn deidı.
Jetımnın közı jasty eken,
Udan da dämı aşy eken.
Äkenıŋ mūz ba jüregı
Ananyŋ bauyry tas pa eken…
Asqar İmanqūlov pen Aigül Iliias esımdı ūl men qyzdyŋ taǧdyry osy än joldaryn eske tüsıredı. Balalar üiınde tärbielenıp, ata-ana meiırımıne zar bolyp jürgen olardyŋ tıleuın Alla taǧala berıp, äke-şeşelı qyldy. Oǧan qosa qazır Asqardyŋ tört äpkesı bar. Al, Aigüldı aqtöbelık Jetesovter otbasy asyrap alypty. Būl önerlı otbasy eken. Otaǧasy Ömırhan aǧanyŋ aituynşa, olar ansambl qūryp, oblystyq baiqauda bas jülde jeŋıp alǧan. Boi jetıp qalǧan Aigüldı de bügınderı önerge baulyp jür.
Bırneşe jyl būryn Türkıstan qalasynda qaiǧyly oqiǧa oryn alyp, bır künde üş balany ata-anasynan aiyrdy. Jetımın jylatpaǧan elmız ǧoi, sodan balalardyŋ naǧaşy aǧalary jienderın qolyna alady. Alaida, onyŋ da ǧūmyry ūzaqqa barmaidy. Üşeuınıŋ arasyndaǧy estiiary Gülzira bauyrlaryn balalar üiıne bermeimın dep belgılı jazuşy Dulat İsabekovtıŋ dramasyndaǧy äpkedei jetkızemın dep tyrmysyp baǧady. Bıraq, qyzdyŋ aty qyz emes pe, onyŋ üstıne jas bolǧannan keiın qolynan köp närse kele qoimaidy. Ol jaǧdaidan Kärima esımdı meiırımdı apai habardar bolyp, «Jan jyluy» baǧdarlamasyna balalardyŋ jaǧdaiyn jetkızedı. Siujet ötkennen keiın Türkıstandaǧy käsıpkerler būl ıske jūmylyp, 5 bölmelı üi soǧyp beredı. Qūlaǧynan auyrlap qalǧan Gülziraǧa Germaniiada ota jasatady.
Aqmola oblysy Aqmol auylynyŋ tūrǧyny Amangeldı Qapanovty 25 jasynda qasköiler pyşaqtap ketedı. Būl oqiǧadan bıraz jyl ötse de, sodan berı arbaǧa taŋylyp qalǧan ol aiaǧyna tūra almai keledı. Alaida, moiymaidy. Süienışın sporttan tauyp, arbamen 100-200 metrge jügıre bastady, keiınnen zıltemır köterdı. Qazır de bimen ainalysyp jür. Ol önerın «Qazaqstan» ūlttyq arnasynyŋ baǧdarlama jürgızuşısı Ardaq Otarbaev ekeuı körsettı de. Arbada otyryp, qyzdarmen şyr ainalyp bilegen olar bidı tamaşa meŋgergenderın tanytty.
Amangeldı aǧamyz bıreuge masyl bolmai, öz ısın de aşty. «Bolaşaq» qoǧamdyq bırlestıgın qūrǧan ol 3 jyldan berı mümkındıgı şekteulı jandarǧa zaŋgerlık, psihologiialyq, qarjylai kömek körsetıp jür. Jary ekeuı sauap ıs jasap, balalar üiınen ekı balany da asyrap alǧan.
Bügıngı künge deiın «Jan jyluy» baǧdarlamasynyŋ 250 körsetılımı ötıp, 500 adamnyŋ taǧdyry turaly baiandalǧan. Būl, kömekke mūqtaj adamnyŋ älı de köp ekenın körsetedı. Sondai jandardyŋ bırı – Äset Jienbek esımdı säbi. Marganes qyşqylyn jūtyp, kömekeiın küidırıp alǧan ol qazır tütıkşe arqyly tamaqtanyp jür. Oǧan dereu ota jasatu qajet eken. Baǧdarlamanyŋ bes jyldyǧyna arnalǧan konsertte ol jönınde dabyl qaǧyldy. Balaǧa kömek beru üşın konsert zalynyŋ dälızınde aqşa salatyn jäşıkter qoiylǧan. Dosymjan Taŋatarov, Gülnūr Orazymbetova, Baqyt Şadaeva, Jaŋabai Ötegenov, Maira Iliiasova syndy belgılı änşıler men halyqaralyq «Şabyt» baiqauynyŋ Gran-pri iegerı Şolpan Şärıpova, Janar Däukeeva, Qanat Ümbetov än salǧan şara negızınen osy üşın ūiymdastyryldy.
Amanǧali QALJANOV
