Astanadaǧy «Qazaqstan» ortalyq konsert zalynda QR Mädeniet jäne sport ministrlıgı, «Nūr Otan» partiiasynyŋ Astana qalalyq filialy jäne halyqaralyq «Jas-Ai» medisinalyq ortalyǧynyŋ ūiymdastyruymen Elbasynyŋ «Bolaşaqqa baǧdar: ruhani jaŋǧyru» maqalasyna orai «Ruh jaŋǧyryǧy» atty halyqaralyq aqyndar aitysy dübırlep öttı. Oǧan är öŋırdıŋ ükılep qosqan jas jüirıkterı jinalyp, sözdı qadır tūtar qauymnyŋ delebesın qozdyrdy.
Aitysqa bas-aiaǧy 16 aqyn qatysty. Köbı – esımderı jūrtşylyqqa onşa tanyla qoimaǧan jastar. Olardyŋ arasynda azuyn aiǧa bılegen Ainūr Tūrsynbaeva, Jandarbek Būlǧaqov, Syrym Äuezhan sekıldı atadan qalǧan asyl önerdı biıkke köterıp jürgen düldülder de boldy. Ötken ǧasyrdyŋ toqsanynşy jyldary Almatyda ötken halyqaralyq aitysta aq boz at mıngen Jadyra Qūtjanovamen finalda kezdesıp, torǧailyq aqyn «bır şelek su köterer qauqary joq» dep qaǧytatyn Moŋǧoliiadan kelgen Qabdıjälel Sahariia aǧamyz da jas perılermen söz qaǧystyrdy.
Bır sözben aitqanda, alty saǧatqa sozylǧan aitys körermennıŋ köŋılınen şyqty. Keibır jas aqyndardyŋ täjıribesızdıgı de baiqaldy. Äbden jauyr bolǧan taqyryptardy şiyrlap jürıp aldy. Äsırese, Syrym men Ainūrdyŋ aitysy eldı ädemı äzılge bölep, ezuın jiǧyzbady. Jandarbektıŋ aq jaŋbyrdai tögıp-tögıp jıbergen jyr şumaqtary jūrtşylyqtyŋ ruhyn qairady. Jas aqyn Äset Düisebaidyŋ da suyryp salma önerıne köpşılık täntı boldy. Bügıngı qoǧamdaǧy özektı mäselelerdıŋ bärı aqyndardyŋ nazarynan tys qalǧan joq.
Sonymen, elordada dübırlep ötken halyqaralyq aitysta jas talant Jandarbek Būlǧaqovtyŋ aiy oŋynan tuyp, bas jüldege ie boldy. Oǧan şeteldık avtokölık tabys etıldı. Bırınşı oryndy Syrym Äuezhan jeŋıp aldy. Ekınşı oryndy alǧyrlyǧymen tamaşa öner körsetken Äset Düisebai qanjyǧasyna bailady. Üşınşı oryn Ainūr Tūrsynbaevaǧa būiyrdy. Sonymen qatar, Arzygül Qaiymbekqyzy, Mūhamedjan Mansūrov, Farhat Maratūly, Talǧat Myqi sekıldı aqyndarǧa yntalandyru syilyǧy tabystaldy.
Azamat ESENJOL
