Astanalyq tärtıp saqşylary köpten kütken jaŋa ülgıdegı qyzmettık kiımge köşıp, jahandyq polisiia qataryna enuge kezektı qadamyn basty. Ūzaq talqylap, jyl būryn tanystyrylǧan polisiia formasy alǧaşqy bolyp elordalyq poliseilerge būiyrdy. Jaŋa kiımge auysuǧa bailanysty Nūr-Sūltan qalasy PD bastyǧy Marat Tölebaev patruldık polisiia polkınıŋ plasynda ötken jeke qūramnyŋ sap tüzeu saltanatyna qatysty.
Polisiia qyzmetkerlerıne arnalǧan jaŋa ülgıdegı kiımdı daiarlau – ışkı ıster organdaryn jaŋǧyrtu turaly jol kartasynyŋ bır tarmaǧy. Atalǧan kiım ülgısı aluan türlı aua raiy jaǧdaiynda jūmys ısteitın qyzmetkerlerdıŋ lebızderı eskerıle otyryp, olarǧa qonymdy ärı qolaily etıp pışuge erekşe den qoiylǧan.
Jaŋa kiımnıŋ nobaiy men konstruksiiasy boiynşa patruldık polisiia jäne syrtqy qyzmet mamandaryna arnalǧan nysandy kiımder bolyp toptastyrylǧan. Sol siiaqty tūrǧyndarmen bırınşı bolyp tıldesetın uchaskelık polisiia inspektorlaryna arnalǧan jekelegen ülgıde kiım äzırlenıp otyr.
Būrnaǧydai tärtıp saqşylaryna yŋǧaisyzdyq tuǧyzatyn jetondar, emblemalar, jūldyzdar jäne kokardalar toqyma mataǧa almastyrylǧan. Būl – qyzmet barysynda türlı jaǧdailarda olardyŋ qūlap qalu, zaqymdaluyna qarsy taptyrmas amal.
Tüngı mezgılderde joldaǧy qauıpsızdık deŋgeiın küşeitu maqsatynda atalmyş kiımge jaryq şaǧylystyratyn belgıler köptep berılgen.
Is-şara barysynda departament basşylyǧy qyzmetkerlerdıŋ daiyndyǧy men nysandy kiımmen qamtamasyz etıluın tekserdı.
«Jaŋa nysandy kiım būrynǧysynan aitarlyqtai erekşelenedı. Eŋ bastysy, qyzmet atqaruǧa öte yŋǧaily jäne jaily. Uchaskelık polisiia inspektory halyqqa, qoǧamǧa qyzmet etedı, būqaramen etene jūmys ısteidı, qūqyq būzuşylyqty anyqtaumen jäne onyŋ aldyn alumen ainalysady. Osyny jüielı türde ıske asyru üşın qolaily kiım qajet. Jaŋa kiım ülgısı osyǧan säikes keledı» deidı Saryarqa audany PB №66 UPP inspektory Nūrdäulet Taŋatarov.
Jaŋa formanyŋ jaŋalyǧy köp. Endıgıde poliseilerdıŋ bır parasy būrynǧydai jeide kiıp, galstuk taqpaidy. Ūdaiy ütıktep qyr salatyn şalbar da joq. Jügırgende kedergı keltıretın tuflidıŋ ornyna sporttyq aiaq kiımnıŋ berıluı qūqyq būzuşyny qualaǧan kezde öz kömegın tigızedı. Būl – uchaskelık polisiia inspektory Abzal Äbıldaevtyŋ pıkırı.
Sonymen qatar jaŋa kiımnıŋ oŋ jaq keude tūsynda polisiianyŋ qyzmetınen habar beretın belgı, oŋ iyǧynda qala nemese oblys atauynyŋ emblemasy, sol iyǧynda QR IIM emblemasy tıgılgen. Arqasynda, keudesınde jäne aiaq kiımınde latyn qarpımen «Polisia» jazuy bederlengen. Kiteldıŋ ornyna jempır kiiuı de üilesımdı ekenın köruge bolady. Bastysy, älem polisiiasyna ortaq qara-kök tüs saqtalǧan.
«Jaŋa kiım ülgısıne köşu – oŋ özgerısterge baǧyttalǧan qadamdardyŋ bırı. Zamanaui, jeŋıl ärı yŋǧaily forma qyzmette qolaily. Özgerıs kiımde ǧana emes, ışkı ūstanym men tärtıpte bolatynyn atap ötkım keledı. Jaŋa formaǧa auysu qosymşa qarjyny qajet etpeidı jäne eskını esepten şyǧaru arqyly kezeŋmen jüzege asyrylady» deidı elordalyq PD bastyǧy M.Tölebaev.
Esterıŋızde bolsa, bırer jyl būryn qazaqstandyq polisiianyŋ formasyn zamanaui ülgıge köşıru bastamasy köterılgen bolatyn. Bızge beimälım sebeptermen būl üderıs keşıgıŋkıredı. Eşten keş jaqsy degendei, ebedeisız kiımnen elge ūnamdy qalypqa kelgenı jön boldy dep esepteimız. Öitkenı psihologiiada kiımnıŋ tüsı adamnyŋ özıne, ainalasyna özındık äser beretını däleldengen.
