Prezident Qasym-Jomart Toqaev belgılı jurnalist, mediamenedjer Batyr Qazybaevtyŋ dünieden ötuıne bailanysty onyŋ anasy tanymal qalamger, ūstaz Orynşa Qarabalinaǧa köŋıl aitu jedelhatyn joldady.
«Ardaqty ūlyŋyz Batyr Käkımjanūly aqparat salasynda tabysty qyzmet etıp, ırı mediajobalardy jüzege asyrdy. Otandyq aqparattyq portaldar, radio men telearnalardyŋ negızın qalap, elımızdıŋ jurnalistika salasynyŋ damuyna ölşeusız üles qosty. Özınıŋ tabiǧi qarapaiymdylyǧymen, ūşqyr oilarymen jäne ıskerlıgımen elge syily boldy. Ömırde adal eŋbek etıp, öz ısınıŋ bılgır mamany retınde soŋyna öşpes ız qaldyrǧan Batyr Käkımjanūlynyŋ jarqyn beinesı ūmytylmaidy» dep jazylǧan Prezidenttıŋ jedelhatynda.
27 nauryzda Tengrinews.kz negızın qalauşy jäne Alash Media Group holdingınıŋ basşysy Batyr Qazybaev auyr nauqastan 53 jasynda qaitys boldy. Ol – belgılı qazaqstandyq jurnalist ärı jazuşy, köp jyl boiy oblystyq jäne respublikalyq gazetterdıŋ redaksiialarynda basşylyq qyzmet atqarǧan, Qazaqstan Kompartiiasy OK hatşysy bolǧan Käkımjan Qazybaevtyŋ ūly.
Batyr äkesınıŋ jolyn quyp, jurnalistikany taŋdap, tabysty mediamenedjer boldy. Ol 10 jyldan astam uaqyt qūramyna Tengrinews.kz, Vesti.kz, Massaget.kz aqparattyq portaldary kıretın Alash Media Group mediaholdingın, «Jūldyz FM» radiostansiiasyn, «Retro FM» Qazaqstan, «STV» telearnasyn basqardy, «Jetınşı arnanyŋ» negızın qalady. Sondai-aq Batyr Qazybaev Qazaqstandaǧy alǧaşqy Tengri FM rok-radiostansiiasyn, al keiınırek eldegı alǧaşqy qazaq tılındegı «Jūldyz FM» tolqynyn qūrdy. Ol negızın qalaǧan The Spirit of Tengri etnikalyq muzyka festivalı Almatynyŋ turistık kartasy ǧana emes, ülken mädeni jobaǧa ainaldy.
Mediamenedjer qazaqtıldı auditoriiaǧa baǧyttalǧan jobalarǧa da erekşe nazar audardy. Massaget.kz jastar saity ıske qosyldy. Tengrinews.kz saitynyŋ qazaq tılındegı nūsqasy, «Jūldyz FM» radiostansiiasy, bügınde qoǧamdyq-saiasi saitqa ainalǧan «Alaş ainasy» gazetı aşyldy. «Qazır qazaq tılınde jaŋa kontent paida bolyp jatqan qyzyq uaqyt, oǧan qatysu – men üşın maqtanyş» degen edı Batyr Qazybaev.
Otandyq media salasyn damytudaǧy Batyr Qazybaevtyŋ eŋbegı laiyqty baǧalandy. Ol Qazaqstan Respublikasy Prezidentınıŋ Jarlyǧymen «Qūrmet» jäne «Parasat» ordenderımen, «Eren eŋbegı üşın» medalımen marapattaldy. Ökınışke qarai, ötken jyly täuelsızdıgımızdıŋ 30 jyldyǧyna orai «Parasat» ordenımen marapattalǧandaǧy jaŋalyqty syrqattanyp jatyp estıp, saltanatty jinalysqa bara almady. Joǧary memlekettık marapatty NūrSūltan qalasynyŋ äkımı Altai Kölgınov pen būrynǧy Ädılet ministrı Marat Beketaev üiıne arnaiy baryp, el basşysynyŋ atynan saltanatty türde tapsyrdy.
Nūr-Sūltan qalasynyŋ äkımdıgı jäne «Elorda Aqparat» JŞS ūjymy Batyr Qazybaevtyŋ tuǧan-tuystary men jaqyndaryna qaiǧyryp, köŋıl aitady.
