M.Ötemısūly atyndaǧy Oquşylar saraiynda «Haq söile, qyzyl tılım, adal sairap» atty mänerlep oqudan qalalyq saiys öttı. Būl ıs-şara Astana qalasy äkımdıgınıŋ «Ruhaniiat» memlekettık mekemesınıŋ ūiymdastyruymen qazaqtyŋ aqiyq aqyny, jazuşy, dramaturg Iliias Jansügırovtıŋ 130 jyldyǧyna arnaldy.
Is-şaranyŋ maqsaty: qazaq ädebietınıŋ negızın qalauşylardyŋ bırı, qazaq ädebietınıŋ barlyq janrynda qalam terbegen ardaqty aqyn, jazuşy, dramaturg I.Jansügırovtıŋ şyǧarmaşylyq mūralaryn zerdeleu. Tegeurındı qalamger, marǧasqa aqynnyŋ poeziia men dramalyq şyǧarmalaryn nasihattau arqyly talantty jastardy qoldau, halyqqa tanytu. Körkem tuyndylardyŋ şoǧyryn düniege äkelgen tau tūlǧaly qairatkerdıŋ qūndy oilary men ölmes öleŋderın mänerlep oqu barysynda qūnarly tılımızdıŋ örısın keŋeitu, baba mūrasyn qadırleitın ruhani düniesı bai jastardy tärbieleu.
Bırınşı kezeŋ boiynşa jastar aqynnyŋ öleŋın mänerlep jatqa oqyp, ekınşı kezeŋde I.Jansügırovtıŋ proza janryndaǧy şyǧarmalarynan beinelı körınıster körsetıp, sahna önerınıŋ biıktıgın, daralyǧyn körsetken özderınıŋ akterlık şeberlıkterımen erekşelendı. Saiys şarttary boiynşa 12 qatysuşy öner bäigesıne tüstı.
Topty jaryp, «Jüzden jüirık, myŋnan tūlpar atanǧan jüldegerler anyqtalyp, olarǧa diplom, madaqtamalar tabystalyp, baǧaly syilyqtar berıldı. Bas jüldenı Astana qalasy äkımdıgınıŋ «Servis jäne turizm kolledjınıŋ studentı Bekzat Orazgeldı qanjyǧasyna bailasa, 1-oryndy Astana halyqaralyq universitetı pedagogikalyq kolledjınıŋ studentı Aqmarjan Ädılhan ielendı. 2-oryn Astana qalasy äkımdıgı «Tehnikalyq kolledjınıŋ» studentı Aqbota Balabai men «Astana IT University» JŞS kolledjınıŋ studentı Demejan Sovetqaliǧa būiyrdy. 3-oryn «Şipager» medisinalyq kolledjınıŋ studentı Nūrsūlu Ahmetovaǧa, L.Gumilev atyndaǧy Euraziia ūlttyq universitetı kolledjınıŋ studentı Sezım Qūrmanälıge, Astana qalasy joǧary medisinalyq kolledjınıŋ studentı Aian Särsenbige berıldı. Saiys erejesıne säikes qatysuşylarǧa 5 arnaiy jülde de taǧaiyndaldy. S.Seifullin atyndaǧy arnaiy jülde Qaraqat Namazbaevaǧa, B.Mailin atyndaǧy arnaiy jülde Saiat Särsenbekke T.Rysqūlov atyndaǧy arnaiy jülde Aiqyn Äşırhanǧa, J.Aimauytov atyndaǧy arnaiy jülde Ernūr Nūrjanǧa, S.Qojanov atyndaǧy arnaiy jülde Nūǧman Qanjarbekke tabystaldy.
Aijan Serıkqyzy,
Astana qalasy äkımdıgınıŋ «Ruhaniiat» mekemesınıŋ baspasöz qyzmetınıŋ jetekşısı
