Bır jyldan berı Nūr-Sūltanda «Janūia» otbasy institutyn qoldau ortalyǧy jūmys ısteidı. Onda elordadaǧy otbasylar qūqyqtyq, psihologiialyq jäne äleumettık kömek alady. Ortalyq jūmys tabuǧa, käsıptık oqudan ötuge, äleumettık jäne tūrǧyn üi baǧdarlamalary turaly aqparat aluǧa, sondai-aq olarǧa qatysuǧa kömektesedı.
Aşylǧan künnen bastap ortalyqqa 42 017 saual boiynşa 23 039 ötınış kelıp tüstı. Adamdar qoiǧan sūraqtardyŋ köp bölıgı atauly äleumettık kömek – 22 620, memlekettık järdemaqy – 6 278 jäne tūrǧyn üi – 3 020 mäselelerıne qatysty.
Ortalyqta 12 memlekettık organ men kvazimemlekettık sektor ūiymdarynyŋ jūmysy ūiymdastyrylǧan. Onda «Azamattarǧa arnalǧan ükımet» KEAQ, jeke sot oryndauşylarynyŋ öŋırlık palatasy, qala äkımdıgınıŋ äkımşılıgı, jūmyspen qamtu ortalyǧy, tūrǧyn üi qory, tūrǧyn üi qūrylys jinaq bankı, bıryŋǧai jinaqtauşy zeinetaqy qory, äleumettık medisinalyq saqtandyru qory, qazpochta, qūqyq qorǧau organdary jäne basqa da qūrylymdardan keŋes alu mümkındıgı bar.
Sondai-aq «Janūiada» «Käsıpker ana» analarǧa öz biznesın damytuǧa kömektesedı. Köpbalaly jäne az qamtylǧan otbasylar mūnda öz biznesın bastauda qoldau taba alady. Ol üşın biznes qūru täjıribesımen bölısetın tabysty äieldermen Self Made motivasiialyq biznes-treningter ötkızıledı.
«Janūia» ortalyǧynyŋ alaŋynda Nūr-Sūltan qalasy äkımınıŋ qoǧamdyq qabyldauy da aşyldy. Azamattardy keste boiynşa qabyldaudy audan basşylary, basqarmalar men basqa da ūiymdardyŋ basşylary jürgızedı.
«Qiyndyqqa kezıkken janūialarǧa kömek körsetetın ortalyqtyŋ basty maqsaty – otbasylarǧa psihologiialyq, äleumettık jäne zaŋgerlık kömek körsetu. «Janūiada» 70-ten asa memlekettık qyzmet körsetıledı. Ortalyqta ruhani qūndylyqtardy damytuǧa, qaiyrymdylyq, kömek körsetuge baǧyttalǧan ıs-şaralar, sondai-aq köp balaly analarǧa arnalǧan bos oryndar järmeŋkelerı men seminar-treningter ötkızıledı» deidı «Janūia» otbasy institutyn qoldau ortalyǧynyŋ direktory Äigerım Täŋırbergenova.
Esterıŋızge sala keteiık, «Janūia» otbasy institutyn qoldau ortalyǧynyŋ jūmysy 13 mamyrdan bastap qaita jandandy. Qabyldau sanitarlyq talaptardy saqtai otyryp jüzege asyrylady. Būl rette ortalyqtyŋ barlyq qyzmetterın onlain rejimde nemese 57-87-00, 57-88-88 nömırı arqyly aluǧa bolady.
Baqyt TOQSANBAEVA, köpbalaly ana
«Ortalyqqa täjıribelı motivtorlar kelıp, treningter ötkızedı. Būl men üşın ülken mümkındık. Öz biznesımdı bastau üşın özımnıŋ küştı jäne osal tūsymdy anyqtadym. Osyndai şara ūiymdastyrylmasa, biznes bastau men üşın qol jetpes arman bolyp qala beretın edı. Täjıribelık sabaqtar maǧan biznes-joba jaiyn qarastyruǧa septıgın tigızdı. Küizelısten arylyp, jaŋaşa oilauǧa üirettı. Şeşım qabyldauǧa kömektestı. Tūlǧalyq qasietterımdı taldau arqyly öz baǧytymdy, öz salamdy taŋdai aldym. Aldaǧy uaqytta käsıbımdı aşyp, qoǧamǧa paidamdy tigızgım keledı. Armanyma qol jetkızu jolynda kömektesken, şabyttandyrǧan «Janūia» ortalyǧyna alǧys bıldıremın»
Ainūr MARATOVA, qala tūrǧyny
«Basyma qiyndyq tüskende qaida baryp, kımnen kömek sūraudy bılmedım. Sodan qūrbym «Janūia» ortalyǧyna baryp köruge keŋes berdı. Oǧan deiın qoldau ortalyqtarynyŋ barynan beihabar edım. Maǧan ortalyq aiaqqa qaita tūruǧa, ömır süruge üirettı. Üş balamen jūmyssyz, üisız qalǧanymda pana boldy. Mamandyq boiynşa jūmys tabuǧa kömektestı. Qazırgı taŋda päter jaldap tūramyn, balalarym ne ışemın, ne jeimın demeidı. Tolyqtai aiaqqa tūrdym. Täjıribelı mamandardan psihologiialyq, zaŋgerlık tūrǧydan keŋester alyp, ruhani myqty adamǧa ainaldym. Ortalyq mamandary qūrmetke laiyq»
Naima NŪRALYQYZY
