Osy dünienı jazuǧa bır sapta jürgen ärıptesımnıŋ äleumettık jelıde jariialaǧan jazbasy sebep boldy. Qalamdas dosym elge syily, tanymal aqyn aǧamyzdyŋ jurnaliske bergen sūhbatyndaǧy: «İä, kazinoǧa baratynym ras. Keide oǧan ūtuǧa nemese tynyǧu üşın baram» degen sözı üşın ony terıs atqa mıngızıp, «qazır paiǧambar jasynan asqan aǧalarymyzda būrynǧy qariialardyŋ boiyndaǧy qazaqy qasiet azaiyp barady» degen syŋaida şymşyp ötedı. Osyny basqa äleumettık jelı qoldanuşylary ılıp äketıp, abyroily azamatty bıraz «jerge» aparyp tastaidy. Onyŋ ışınde ǧaibat aitylǧan pıkırler de bar. Jalpy, adamdy jaqyn bılmei syrtynan söz aitu adamgerşılıkke laiyqty mınez emes.
Bala künımızde bız de qazaqy tärbienıŋ qainary sanalǧan ata-äjelerımızdı körıp östık. Olar qanşa degenmen köşpendı däuırdıŋ şet jaǧasyn körgen, qazaqylyqty berık ūstaǧan jandar boldy. Qazır zaman, uaqyt özgerdı. Endı alpystaǧy aǧa-apalarymyzǧa däl solardai bolmady dep kınä taǧu da dūrys emes. Babalarymyz «zamanyna qarai adamy» degendı beker aitpaǧan.
Keiıngı kezderı äleumettık jelıde osy bır jaǧymsyz qylyq jiı baiqalady. Esımı elge belgılı bır azamat säl sürınıp ketse, bırden mūqatuǧa nemese artyq-auys aitqan pıkırı üşın keketuge daiyn tūramyz. Neşe türlı post jazyp, tabalap şyǧa kelemız. Onyŋ būǧan deiın elge jasaǧan qaiyrymyn, jaqsylyǧyn körmeimız. Jūmyr basty pende bolǧannan keiın kez kelgen adam ömırde şalys baspai, qatelespei tūra almaidy. Osyndaida halqymyzdyŋ: «Japalaq maqtansa, jardan qoian aldym der. Jaman maqtansa, jaqsynyŋ jaǧasynan aldym der» degen sözı oiymyzǧa oralady.
Jalpy, būl ädet – otarşyldyqtan qalǧan eskı dertterdıŋ bırı. Otyz jylǧa juyq azat el bolsaq ta būdan qūtylǧan joqpyz. Qaita üdep bara ma dep qorqamyn. Qazaqtyŋ talai igı jaqsylarynan osylai köz jazyp qaldyq.
Belgılı änşı Toqtar Serıkov oryndaityn bır termede: «Jaqsylar jaqsymyn dep aita almaidy, Jamandar jaqsymyn dep aiqailaidy. Jürgen soŋ künde jürıp bauyrynda, Taulardyŋ biıktıgı baiqalmaidy» degen oralymdy şumaqtar bar. Osynda qanşama maǧyna, oi jatyr. Sondyqtan jaqsynyŋ jaǧasynan almai, onyŋ qadırın tırısınde baǧalai bıleiık.
