«Qazaqstan» sport keşenınıŋ janynda senbı-jeksenbı künderı Jambyl oblysynyŋ auylşaruaşylyq järmeŋkesı öttı. «EKSPO-2017» halyqaralyq körmesıne orai ūiymdastyrylǧan järmeŋkede Äulieata öŋırınıŋ öner maitalmandary konsert qoidy.
Qala bazarlarynda 1600 teŋgeden satylatyn jylqy etı – 1500, tauyq etı (800 teŋge) – 580, jūmyrtqa (200-210 teŋge) 160-180 teŋgeden satyldy. Bır qyzyǧy, qoi men siyr etın järmeŋkeden kezdestıre almadyq. Mal şaruaşylyǧymen maqtanatyn oblystyŋ qoi men siyr etın äkelmegenı qyzyq. Sondai-aq, kartop (200 teŋge) – 170, säbız (130 teŋge) – 100, piiaz (140 teŋge) – 125, qyzanaq (350 teŋge) – 300, qiiar (250 teŋge) 150 teŋgeden satyldy.
Jambyl oblystyq Auyl şaruaşylyǧy basqarma basşysynyŋ orynbasary Qairat Amanovtyŋ aituynşa, järmeŋkege öŋırdıŋ 10 audany kelgen. Sondai-aq, ol oblys äkımdıgı käsıpkerlerdıŋ önımderın Astanaǧa tegın jetkızgenın tılge tiek ettı.
– Bügıngı järmeŋke «EKSPO-2017» halyqaralyq körmesıne orai ūiymdastyrylyp otyr. Astanaǧa Jambyl oblysynyŋ auylşaruaşylyq tauar öndıruşılerı men qaita öŋdeu käsıporyndary keldı. Elordaǧa jalpy qūny 138 million teŋge tūratyn 165 tonna önım äkelındı. Tauarlardy jetkızu üşın 8 jük kölıgı men käsıpkerlerdı jetkızu üşın 2 avtobus bölındı. Negızı, järmeŋkede Astana bazarlaryndaǧy baǧadan 20-30 paiyz bolatyn arzan önımder satyldy. Bızdıŋ öŋır halyqaralyq körme aiaqtalǧanşa elordaǧa 5 ret keledı, – dedı ol.
Elorda tūrǧyndary Jambyl oblysynyŋ auylşaruaşylyq önımderıne dän riza. Qala tūrǧyny Tūrsynbek İsataev järmeŋkede auylşaruaşylyq tauarlary tiımdı baǧamen satylyp jatqanyn aitady.
– Jambyl oblysynyŋ järmeŋkesı köŋılımnen şyqty. Öitkenı mūndaǧy baǧalar naryqtaǧy bazarmen salystyrǧanda äjeptäuır arzan. Mäselen, «Şapaǧat» bazarynan et alsaŋ, onyŋ janyna mındettı türde süiek qosyp beredı. Al mūnda qalaǧan etıŋdı satyp aluǧa mümkındık bar eken. Sondai-aq, kartop, qiiar, qyzanaq syndy kökönıster mūnda tiımdı baǧamen satylyp jatyr. Jalpy, öz basym öŋırlerdıŋ önımderın arzan baǧada satyp alu üşın ünemı järmeŋkege kelıp tūramyn, – deidı zeinetker.
Serık JOLDASBAI
