JÄRMEŊKEDE – AIаQTALMAǦAN QŪRYLYS NYSANDARY
Keşe Astana qalasy äkımdıgı men qalalyq prokuraturanyŋ bırlesıp ūiymdastyruymen «Elordadaǧy qauıpsızdık pen jailylyq» jobasy şeŋberınde aiaqtalmaǧan qūrylys nysandarynyŋ järmeŋkesı öttı.
Osymen üşınşı ret ötkızılıp otyrǧan järmeŋkede 70-ten astam qūrylys kompaniialary ökılderınıŋ nazaryna «Arabi-2», «Ümıt bereke», «Köktal-2», «Anisa-2» tūrǧyn üi keşenderı siiaqty qaladaǧy qūrylysy aiaqsyz qalǧan 21 nysan ūsynyldy.
– Järmeŋkenı ötkızudegı maqsatymyz – problemalyq nysandardyŋ qūrylysyn aiaqtaudy qolǧa alu üşın käsıpkerler men investorlardy tartu. İnvestorlarǧa jobalardyŋ rentabeldıgın körsetıp, üleskerlerge
özderı qarjysyn salǧan baspanalaryna qol jetkızuge kömektesu, – deidı Astana qalalyq prokuraturasynyŋ bölım prokurory Temırlan Ädılhanov. Järmeŋkedegı ūsynylyp otyrǧan 21 nysannyŋ aldy – 2006 jyly, soŋy 2014-2015 jyldary salyna bastaǧan. Üleskerlerdıŋ qarjysyn jymqyryp, qūrylysty aiaqsyz qaldyrǧan kompaniialar tekserılıp, üstınen qylmystyq ıs qozǧalǧan. Olardyŋ 29-y temır torǧa toǧytylyp, mülıkterı tärkılengen.
Temırlan Ädılhanovtyŋ aituynşa, rentabeldılık jetkılıktı bolmasa, qūrylys jürgızuşı kompaniia qoldanystaǧy zaŋnamaǧa säikes, TQK men qūzyrly organdardyŋ kelısımımen jobany özgertıp, tiımdı etıp qaita daiyndauǧa qūqyly eken. Ötken jolǧy järmeŋkelerdıŋ nätijesınde 500 adamnyŋ ülesı bar 6 nysannyŋ qūrylysyn aiaqtau jönınde qūrylys kompaniialary men üleskerler arasynda kelısımşart
jasalǧanyn aitady qalalyq prokuraturanyŋ bölım prokurory.
Äkımdıktegı jiyndar men ötken jolǧy järmeŋkelerdıŋ nätijesınde «Kaz Capital Invest» JŞS «Baitau» tūrǧyn üi keşenınıŋ qūrylysyn ärı qarai jandandyrudy qolǧa alǧan.
– «Baitau» tūrǧyn üi keşenı jaqsy jerde ornalasqan, Mäŋgılık el daŋǧylynyŋ boiynda. Alaida nysannyŋ tehnikalyq jaǧynan bıraz kemşılıkterı bar. 2 qabattan ärı qarai salynbaǧan. 200 päterlı tūrǧyn üidıŋ qazır qūjattary daiyndalyp jatyr, – deidı «Kaz Capital Invest» JŞS-tıŋ joba jetekşısı Asylhan Esenov.
Järmeŋkege jinalǧan käsıpkerlerge är joba jeke tanystyrylyp, bos alaŋdar, jer telımderı, jobalardyŋ nobailary körsetılıp, tehnikalyq jaǧdailar jasalǧany turaly aqparattar ūsynyldy. Būl tūrǧyda qai nysannyŋ kımge būiyratyny aldaǧy uaqyttyŋ enşısınde belgılı bolmaq.
Nūrdäulet Käkışev