Kezdesu barysynda ekı el arasyndaǧy ekonomika, investisiia, kölık, önerkäsıp, energetika, mädeniet töŋıregındegı yntymaqtastyq mäselesı keŋınen talqylanyp, strategiialyq serıktestıktı odan ärı damytu jaiy söz boldy.
İspaniia – Qazaqstanmen strategiialyq serıktestık turaly qūjatqa qol qoiǧan ekınşı europalyq el. Memleketımız täuelsızdıgın alǧaly berı ekı el arasyndaǧy jarasymdy bailanys üzılgen emes.
– Bız İspaniia Koroldıgınıŋ qoldauy men yqylasyn ūdaiy sezınıp kelemız. Qazaqstanǧa saparmen kelgen İspaniianyŋ būrynǧy premer-ministrlerımen ärdaiym dostyq qarym-qatynasta boldyq. EKSPO-2017 bükılälemdık körmesın ötkızuge arnalǧan konkursta da İspaniia bızge tıleules boldy, – dedı Memleket basşysy.
Elımızdıŋ EQYŪ-ǧa töraǧalyǧy turaly maŋyzdy şeşım İspaniia astanasy – Madridte qabyldanǧany belgılı. Onyŋ respublikamyz üşın simvoldyq mänı erekşe ekendıgın atap ötken Elbasy ekı el arasyndaǧy strategiialyq serıktestık turaly kelısım ärı qarai dami beretınıne senım bıldırdı.
– Qazaqstanda İspaniianyŋ ırı kompaniialary jäne 70-ten astam bırlesken käsıporyn jūmys ısteidı. Bız Ükımettıŋ qyzmetı arqasynda İspaniianyŋ ekonomikalyq damuy qalpyna kele bastaǧanyn jäne ornyqty deŋgeige şyqqanyn körıp otyrmyz, – dedı Memleket basşysy.
Qazaqstan Prezidentınıŋ jyly lebızıne alǧysyn bıldırgen Mariano Rahoi myrza ekı el arasynda qalyptasqan jarqyn bailanys jalǧasa beretının aita kele, mūndaǧy tabysty jūmys ıstep jatqan bırlesken kompaniialar ekıjaqty tüsınıstıktıŋ aiqyn körınısı ekendıgın atap öttı.
– İspaniia men Qazaqstan arasynda būrynnan jaqsy qarym-qatynas ornyqqan. Säl keiınırek men sızge Asa Märtebelı İspaniia Korolınıŋ öz qolymen jazǧan hatyn tapsyratyn bolamyn. Bızdıŋ kompaniialarymyz mūnda şyn mänınde öte tabysty jūmys ısteude. Bırlesken qyzmetke atsalysu nietımen İspaniia käsıporyndary ökılderınıŋ qalyŋ tobyn özımmen bırge erte keldım. Bızdıŋ elde qazırgı künı oŋ nätijeler körıne bastady. Osy toqsanda ekonomika salasynda säl ösım bar. Jūmyssyzdyq mäselesı de oŋtaily şeşılıp keledı. Kelesı jyly ahual tıpten jaqsarady degen ümıttemız. Bız auqymdy reformalar jürgızudı jalǧastyra beremız, – dedı İspaniia Ükımetınıŋ töraǧasy.
Kelıssözder barysynda Prezident Nūrsūltan Nazarbaev İspan tarapyna ekınşı düniejüzılık soǧys kezeŋınde Qaraǧandy eŋbekpen tüzeu lagerınde bolǧan ispandyq azamattarǧa qatysty Memlekettık mūraǧattan alynǧan materialdar köşırmesın tapsyrdy.
Qymbat TOQTAMŪRAT
