Astanada Qairat Sügırbekov atyndaǧy jas rejisserlerdıŋ bır aptaǧa sozylǧan I respublikalyq forum-festivalı aiaqtaldy. Oǧan elımızdıŋ on üş teatrynda spektaklderın qoiǧan 20-40 jas aralyǧyndaǧy rejisserler qatysty. Qorytyndysynda bas jülde M.Äuezov atyndaǧy qazaq memlekettık akademiialyq drama teatrynyŋ rejisserı Elık Nūrsūltanǧa J.Erǧalievtıŋ «Qas-qaǧym» spektaklı üşın būiyrdy.
«Ömırden erte ötken jaŋaşyl rejisser Qairat Sügırbekovke arnalǧan forum-festival eŋ aldymen jas rejisserlerdıŋ şyǧarmaşylyǧy qai baǧytta ketıp bara jatqanyn baǧamdauǧa mümkındık berdı. Būl festival keibır jas rejisserlerge ülken önerge degen joldama berıp otyr. Bıraq mynany este saqtauymyz kerek: osyndai baiqaularda oryn, jülde alu – şartty jaǧdai. Onymen adamnyŋ talantyn nemese şyǧarmaşylyq qarym-qabıletın ölşeuge bolmaidy» deidı qazylar alqasynyŋ müşesı, Qazaqstan teatrlar assosiasiiasynyŋ vise-prezidentı Ashat Maemirov.
Onymen qatar Qazaqstannyŋ eŋbek sıŋırgen qairatkerlerı Dulyǧa Aqmolda men Gülsina Mirǧalieva, teatrtanuşy, T. Jürgenov atyndaǧy qazaq ūlttyq öner akademiiasynyŋ dosentı Anar Erkebai, teatrtanuşy, önertanu magistrı Miras Äbıl qazylyq etıp, ädebiet jäne teatr synşysy, halyqaralyq «Alaş» syilyǧynyŋ laureaty Äliia Böpejanova, Ş. Rustaveli atyndaǧy Tbilisi memlekettık teatr jäne kino universitetınıŋ rektory Georgii Margvelaşvili, Qazaqstannyŋ «Serper» jastar syilyǧynyŋ iegerı Äsiia Baǧdäuletqyzy sarapşylar arasynan tabyldy.
Forum-festivalde bırınşı oryn Ş. Aitmatovtyŋ «Mäŋgürt» spektaklın sahnalaǧan M. Ötemısūly atyndaǧy Atyrau oblystyq qazaq drama teatrynyŋ rejisserı Gülnaz Qamysbaevaǧa, ekınşı oryn «A.İ.» jeke teatrynyŋ rejisserı Dina Jūmabaevaǧa (J. Rasinnıŋ «Fedra» spektaklı), üşınşı oryn Şyǧys Qazaqstan oblystyq Jastar teatrynyŋ rejisserı Aidyn Salbanovqa (L. Razumovskaianyŋ «Qymbatty Elena Sergeevna» spektaklı) berıldı. Qairat Sügırbekovtıŋ otbasy taǧaiyndaǧan arnaiy jüldenı Astanadaǧy «Jastar» teatrynyŋ akterı men rejisserı Däuren Serǧazin (M. Levidıŋ «Jer men köktıŋ arasy» spektaklı) ielense, Rüstem Esdäulet atyndaǧy arnaiy jüldenı S. Mūqanov atyndaǧy Soltüstık Qazaqstan oblystyq qazaq drama teatrynyŋ rejisserı Farhad Moldaǧaliev (R. Otarbaevtyŋ «Qasıret» spektaklı) aldy.
Amanǧali QALJANOV
