Jyl saiyn «Jasyl el» sarbazdary qatarynda jūmys ısteuge qyzyǧuşylyq tanytqan jastardyŋ sany artuda. Būl turaly elordalyq kommunikasiialar qyzmetı alaŋynda Astana qalasy Jastar saiasaty mäselelerı basqarmasynyŋ basşysy Qairat Qambarov «Jasyl el» baǧdarlamasy aiasynda jastardy jūmyspen qamtu» atty taqyryptaǧy brifingte aitty.
Memleket basşysy Qasym-Jomart Toqaev jastardyŋ ekologiialyq şaralarǧa qatysuyna ärdaiym män berude. Mysaly, Lineinyi saiabaǧynda «Jasyl Astana» aksiiasy aiasynda 30-ǧa juyq belsendımen aǧaş otyrǧyzu ıs-şarasyna Prezident qatysyp, jastarǧa öz tılegın jetkızdı.
Jasöspırımderdı de jūmyspen qamtudyŋ bır tetıgı retınde jyl saiyn «Jasyl el» memlekettık baǧdarlamasy jüzege asyrylady. Baǧdarlama – jastar men balalardy ekologiia mädenietıne, tabiǧatty aialauǧa jäne eŋbekke bauluǧa arnalǧan igılıktı bastama. 2005 jyldan bastap qolǧa alynǧan būl jobanyŋ biyl XIX mausymy bastaldy. Oǧan 14-ten 35 jasqa deiıngı mektep oquşylary, studentter jäne jūmyssyz jastar qatysa alady.
«Jasyl el» sarbazdary qalamyzdyŋ qūrylys nysanynda ärtürlı sanattaǧy şeberlerdıŋ (qūrylys injenerı, tehnolog, montaj-qūrylys jūmystarynyŋ şeberı) kömekşısı qyzmetın, qala maŋyndaǧy «jasyl beldeude» aǧaş otyrǧyzu, taldar men köşetterdı qopsytu jäne suaru, aǧaştar men köşetterge kütım jasau jūmysy arqyly tabiǧat pen qala kelbetı ündestık tapqan bıregei ekojüienıŋ qalyptasuyna jäne qala saiabaqtary jasyl jelegınıŋ kütımımen ainalysyp, tazalyq jūmysyn jürgızedı.
Jazǧy eŋbek mausymynda jastardy jūmyspen qamtuǧa «Bazis-A» qūrylys kompaniiasy, «Astana kögaldandyru qūrylysy» AQ, «Astana ormany» JŞS, 100-den astam bılım beru mekemesı, 20-ǧa juyq kolledj jäne 10-nan astam joǧary oqu orny serıktes boluǧa kelısım berdı. Byltyr, naqty aitqanda, 4208 jas jūmyspen qamtylsa, biyl da 4200 jasöspırım men jasty qamtu közdelgen. Olardyŋ qatarynda köpbalaly otbasylardyŋ, äleumettık jaǧynan az qamtylǧan otbasylardyŋ balalary, sonymen qatar, ata-anasynyŋ qamqorlyǧynsyz qalǧan balalar da bar. Jobaǧa qatysatyn jastardyŋ barlyǧy arnaiy ekipirovkamen qamtamasyz etıledı.
Qazırgı taŋda mektep oquşylary öz mektepterınıŋ aulasyn tazartu jūmysyn bastap kettı. 14-17 jas aralyǧyndaǧy jastar kämelettık jasqa tolmaǧandyqtan, Eŋbek kodeksıne säikes, densaulyǧyna ziian tigızbeitın, auyr emes, künıne 4 saǧattan artyq emes jūmysqa jūmyldyrylady. Al jūmyssyz jastar qūrylys kompaniialaryna ornalasyp, jūmys ornynan jalaqy alu mümkındıgıne ie. Sonymen qatar, «Jasyl el» jobasy aiasynda qosymşa 65 myŋ teŋge kölemınde syiaqy taǧaiyndalady. Jūmys uaqyty – 8 saǧat. Osy şılde aiynda 1788 jas jūmyspen qamtylady.
