Keşe Astana qalasynyŋ kommunikasiialar qyzmetı alaŋynda qala äkımdıgınıŋ «Jastar» teatry direktorynyŋ orynbasary Erbolat Elubai öner oşaǧynyŋ qyzmetı turaly baspasöz mäslihatyn ötkızdı.
– «Jastar» teatry – san qyrlylyǧy jäne jaŋaşyldyǧymen qazaq teatry önerınde özınıŋ ornyn aişyqty türde belgılegen, jas ta bolsa, jasampaz öner ordalarynyŋ bırı. Teatr sahnasynda körermenge ūsynylar qoiylymdar joǧary körkemdık deŋgeiımen, älemdık teatr önerı jetıstıkterın igerumen erekşelenedı. Soŋǧy uaqytta «Jastar» teatry miuzikl janryna auysqan bolatyn. Onyŋ erekşelıgı – oqiǧa jelısın äreketke, qimylǧa salyp yqşamdap jetkızu. Jattandy sözdı şūbatyp tūrǧannan görı äreket arqyly tüsındıru köpşılıktıŋ nazaryn audartyp, qabyldauyna jeŋıl bolady, – dedı spiker.
Onyŋ aituynşa, atalmyş teatr 2007 jyldyŋ 5 şıldesınde Şyŋǧys Aitmatov pen Äbış Kekılbaiūlynyŋ «Şyŋǧyshan» spektaklımen (inssenirovka avtory – Janyş Qūlmambetov, qoiuşy rejisserı – Nūrqanat Jaqypbai) aşyldy. 16 jyldyq tarihynda halyqaralyq jäne respublikalyq baiqaulardan 14 bas jüldenı ielendı. Bügınde repertuarynda 55-ge tarta spektakl bar. Teatr akterlerınıŋ 99 paiyzy – T.Jürgenov atyndaǧy Qazaq ūlttyq öner akademiiasynyŋ tülekterı, teatrdyŋ negızın qalauşy Qazaqstannyŋ eŋbek sıŋırgen qairatkerı, Abai atyndaǧy Memlekettık syilyqtyŋ laureaty Nūrqanat Jaqypbaidyŋ şäkırtterı.
Öner ūjymy Oŋtüstık Koreia memleketınde Aziia elderı boiynşa eŋ ırı HII halyqaralyq miuzikl festivalıne Ǧ.Müsırepovtıŋ «Jıbek» miuziklımen qatysty. Miuzikl janry damyǧan Fransiia, Resei, Ūlybritaniia, Chehiia, Qytai, Koreia, Taivan syndy ırı memlekettermen qatar, öner körsetu jas ūjym üşın ülken märtebe ärı baǧa jetpes täjıribe boldy.
Astananyŋ mädenietın damytyp, şetelderde bas qalany asqaqtatqany üşın öner ordasy «Elorda jūldyzy» syilyǧyn ielengen.
Biylǧy jarty jyl ışınde teatr 77 spektakl qoiyp, 144-ten astam ıs-şara ötkızdı. Sonyŋ ışınde 105-ten astamy qoiylym bolsa, bırlesken şaralar sany 39-dan asady. Öner ordasynyŋ qoiylymdaryn 32 myŋnan astam körermen, al qaiyrymdylyq şaralary aiasynda 2500 körermen tamaşalady.
«Jastar» teatry janynda «Qanattylar» inkliuzivtı teatry aşylǧan. Būl öner ordasy ekı jyldai būryn körnektı aqyn, Memlekettık syilyqtyŋ laureaty Gülnar Salyqbaidyŋ «Qanattylar» muzykalyq-poetikalyq qoiylymymen şymyldyǧyn türdı. Sodan berı de arada bırneşe spektakl ūsyndy. Sonyŋ ışınde körnektı jazuşy-dramaturg, Abai atyndaǧy Memlekettık syilyqtyŋ iegerı Roza Mūqanovanyŋ şyǧarmasy jelısımen sahnalanǧan «Qyzjylaǧan» spektaklı körermennıŋ ystyq yqylasyna bölendı. Jalpy inkliuzivtı teatr fiziologiialyq erekşelıkterı bar adamdardyŋ talantyn aşuǧa zor mümkındık tudyryp otyr.
Aldaǧy jaŋa mausymda qazaq ädebietınıŋ közı tırı klassigı, Memlekettık syilyqtyŋ laureaty, Qazaqstannyŋ Eŋbek Erı Äkım Tarazidıŋ 90 jas mereitoiyna orai atalmyş teatrda qalamgerdıŋ «Joly bolǧyş jıgıt» dramasyn rejisser Nūrfat Vahitov sahnalamaq. Nūrqanat Jaqypbai «Don Kihot» qoiylymyn qoiady.
