«Prezidenttıŋ bes äleumettık bastamasy» el ömırıne qajettı mäselelerdıŋ şeşım joldaryn körsetken. Elbasy studentterdıŋ jaǧdaiyn nazardan tys qaldyrmai, jataqhana saludy tapsyrǧan edı. Sonymen qatar, juyrda Astanadaǧy mūǧalımderge de jataqhana berıletını habarlandy.
Studentter müddesıne – 118 milliard
Studentter jataqhanasy älı künge deiın özektı bolyp kelgenı jasyryn emes. Joǧary oqu oryndarynyŋ, äsırese 4-kurs studentterı jinalyp, päter jaldap tūruǧa mäjbür bolady. Memleket basşysy osy mäselenı basty nazarǧa alyp, öz ündeuındegı üşınşı bastamasynda 2022 jyldyŋ soŋyna deiın studentterge arnap kemınde 75 myŋ oryndyq jaŋa jataqhana saludy erekşe tapsyrdy. Nūrsūltan Nazarbaevtyŋ tapsyrmasynan keiın tiıstı mekemeler tez arada jūmysqa kırısıp ketkenı de habarlandy. Bılım jäne ǧylym ministrı Erlan Saǧadiev studentterge jataqhana salu jūmystary biyl bastalatynyn, ony jergılıktı äkımdıkter, joǧary oqu oryndary, jeke kompaniialar bırlesıp şeşetının mälım ettı.
Bız osy tūsta studentı köp Euraziia ūlttyq universitetınıŋ jataqhanalaryndaǧy jaǧdaidy anyqtap kördık. Mūnda jataqhananyŋ qūny jylyna 70-80 myŋ teŋge aralyǧyn qūraidy. Biyl oqu ornyna 7 myŋnan astam student tüsıptı. Būǧan qosa, jataqhana boiynşa şeşımın tappai tūrǧan bırşama problema da barşylyq. Mäselen, byltyr №6 studentter üiınıŋ bır bölmesıne segız adamnan ornalastyrylǧan kez bolypty. Al 4-kurs studentterı arasynda köp balaly otbasylardan şyqqan, mügedek sekıldı arnaiy jeŋıldıgı barynan özgesı biyl taǧy da päter jaǧalap jür. Byltyrǧy jartas älı sol qalpynda. Degenmen universitet basşysy aldaǧy jyldary būl mäsele bırtındep şeşıletının jetkızdı. «2019-2021 jyldary 3 bloktan tūratyn 2467 oryndyq jataqhana qūrylysy bastalmaq. Būl – Elbasy tapsyrmasyn oryndau jolyndaǧy jauapty ıs-şara» dedı Erlan Sydyqov esep beru jiynynda.
Al studentter üiınıŋ qūrylysy üşın jūmsalatyn qarjy respublikalyq biudjetten bölınbek. Memleket basşysynyŋ tapsyrmasyn oryndau maqsatynda 118 milliard teŋge qarastyrylǧan. Bıraq būl soma aldaǧy bes jyl ışınde kezeŋ-kezeŋımen bölınıp otyrady. Aita keter bır mäsele, jataqhanalardyŋ salynuy oqu baǧasyna eş äser etpeidı.
Şaǧyn päterler de salynady
Qazırgı uaqytta Astana äkımdıgı mektep mūǧalımderın jataqhanamen qamtamasyz etu mäselesımen ainalysyp jatyr. Qalalyq Bılım basqarmasynyŋ basşysy Änuar Janǧozinnıŋ aituynşa, qazır 188-köşenıŋ boiynda ornalasqan bır jataqhananyŋ qūrylysy aiaqtalyp qaldy. Mūnda äkımdık 250 mamandy qonystandyrmaq. Olardyŋ arasynda eŋbek ötılı joǧary, oqu ornyn qyzyl diplommen bıtırgen ūstazdarǧa basymdyq berıledı. Al jataqhanaǧa ötınış bergen mūǧalımder arnaiy qūrylǧan komissiia arqyly ırıkteledı. Bır ökınıştısı, bölmelerdıŋ tar boluyna bailanysty būl jataqhana äzırge tek otbasyn qūrmaǧan ūstazdarǧa ǧana berıledı.
Osy oraida täjıribelı mūǧalımderdıŋ köbı otbasyly jandar ekenı, olarǧa qandai kömek körsetıletını turaly oi kelerı anyq. Astanaǧa jyl saiyn öŋırlerden 400-500 mūǧalım keledı. Olardyŋ bärın bır mezette jataqhanamen qamtamasyz etu mümkın emes. Basqarma basşysynyŋ aituynşa, hostelder ūsynylmaq. Al onyŋ qūny aiyna 35-45 myŋ teŋgenı qūraidy.
– Aimaqtardan keletın ūstazdar sany az emes ärı olardyŋ köbı – otbasyly jandar. Osyǧan bailanysty äzırge öz salasynda üzdık atanǧan ūstazdardy jataqhanaǧa ornalastyrudy josparlap otyrmyz. Mysalǧa, universitet tülegı bolsa, onyŋ jetıstıkterı men taǧylymdamasy basty nazarǧa alynady. Ärine, eŋbek ötılı bar mamandar da eskerıledı, – deidı Änuar Janǧozin.
Aldaǧy uaqytta mektep ūstazdaryna arnalǧan şaǧyn päterlerdıŋ qūrylysyn bastau da josparda bar.
