Memleket basşysy Qasym-Jomart Toqaev Astana qalasyn damytu mäselelerı jönındegı keŋeste jaiau adamǧa arnalǧan köşenı köbeitu keregın eskertken edı. Prezident tapsyrmalaryn jüielı oryndau qolǧa alyndy. Oǧan Astanada kezektı jaiau jürgınşıler promenadynyŋ aşyluy dälel.
Soŋǧy jyldary elordalyqtardyŋ qolaily demalysy üşın jaŋa ärı tartymdy oryndar aşyluda. Bas qalada jandanǧan köşenıŋ bırı – Q.Sätbaev köşesı. Mūnda Q.Mūŋaitpasov köşesınen A.Petrov köşesıne deiın qaita jaŋǧyrtu jūmysy jürgızıldı. Jaiau jürgınşıler jolynyŋ jalpy ūzyndyǧy – 3,5 şaqyrym.
– Q.Mūŋaitpasov köşesınen A.Petrov köşesıne deiıngı jūmys aiaqtaldy. Köleŋkelı şatyrlar, oiyn alaŋdary ornatylyp, aǧaştar men jasyl jelekter otyrǧyzyldy. Būl – qaladaǧy kögaldandyrylǧan köşelerdıŋ bırı. Mūnda ırı jöke aǧaştary, köpjyldyq būtalar jäne t. b. otyrǧyzyldy, – dedı qala äkımı Jeŋıs Qasymbek.
Al A.Petrov köşesınen B.Momyşūly daŋǧylyna deiıngı uchaske qyrküiek aiyna deiın aiaqtalady.
– Qala tūrǧyndary men qonaqtary üşın Aqbūlaq jaǧalauy jaily orynnyŋ bırı bolady, al «Amman» jäne «Abylai han» köpırlerınıŋ astynda jaiau jürgınşıler ötkelı qūryldy. Olar Aqbūlaq özenınıŋ boiyndaǧy saiabaq klasterın özara bailanystyrady.
Ortalyq jaǧalaudyŋ tarihi köşelerı (Jeltoqsan, Beibıtşılık, Būqarbai batyr köşelerı) jäne t. b. jaŋaryp jatyr. Biyl barlyǧy 165-ten astam aula men qoǧamdyq keŋıstıktı abattandyramyz, – dedı elorda basşysy.
Bas qalany jasyl ärı jaily qala etetın jūmystar jalǧasa beredı.
