Bılım beru mekemelerı basşylaryna qoiylatyn talap küşeiedı. Būl turaly elordadaǧy №54 mektep-liseiınde qala äkımı Äset İsekeşev, Bılım jäne ǧylym ministrı Erlan Saǧadiev, Memlekettık qyzmet ısterı jäne sybailas jemqorlyqqa qarsy ıs-qimyl agenttıgınıŋ töraǧasy Alik Şpekbaev jäne bılım beru mekemelerı basşylarynyŋ qatysuymen ötken «Astana – adaldyq alaŋy» jobasynyŋ aralyq nätijesın qorytyndylau kezdesuınde belgılı boldy.
Jobanyŋ negızgı maqsattarynyŋ bırı – senıp tapsyrylǧan mekemedegı sybailas jemqorlyqqa qarsy saiasatty jüzege asyru üşın memlekettık mekemelerdıŋ bırınşı basşylarynyŋ jeke jauapkerşılıgın arttyru, sondai-aq azamattardyŋ memlekettık qyzmetterdı alu deŋgeiın arttyru.
Bılım beru mekemelerınıŋ direktorlary üşın äzırlengen jaŋa qūjat zaŋdylyq, aşyqtyq, qoljetımdılık jäne käsıbi qyzmettıŋ jariialylyǧy qaǧidattaryn saqtau üşın bırınşı basşylardyŋ jauapkerşılıgın anyqtaidy. Baǧynyştylardyŋ zaŋsyz äreketterı üşın jeke jauapkerşılıgı belgılengen. Oquşylar men ata-analardan qarajat jinaudy ūiymdastyruǧa qataŋ tyiym salynady. Qūjat biudjetten bölıngen qarjy resurstaryn ūtymdy, aşyq jäne zaŋdy ıske asyru üşın jauapkerşılıktı küşeitudı mındetteidı.
Jiynda qala äkımı Äset İsekeşev soŋǧy 3 jylda Astananyŋ bılım beru salasyn qarjylandyru kölemı 70 paiyzǧa ūlǧaiǧanyn mälımdedı. Naqty derektermen söilesek, qarjy 44,6 mlrd teŋgeden 65,2 mlrd teŋgege deiın ösken.
– Mūnymen qosa, jeke investorlardy jūmyldyryp jatyrmyz. Mäselen, elordadaǧy mektepke deiıngı bılım beru salasynda käsıpkerlerdıŋ aralasuymen soŋǧy 3 jylda 18 myŋ jaŋa oryn paida bolǧanyn baiqadyq. Taǧy bır mysal, 75 memlekettık balabaqşaǧa, negızı, 96 mlrd teŋge qarjy böluge tiıs edık. Al bız memlekettık tapsyrysty ornalastyrudyŋ arqasynda jylyna 6 mlrd teŋge qarjy jūmsaimyz, – dedı qala basşysy.
Elorda äkımınıŋ sözınşe, bılım beru salasynda tūrǧyndar ötınışınıŋ 80 paiyzyn qūraityn eŋ tanymal memlekettık qyzmetter körsetu prosesterı avtomattandyrylǧan. «Būl degenımız – balabaqşaǧa esepke alu men mektepke qabyldau, kolledjderdıŋ jataqhanalaryna qūjattardy qabyldau men joldama beruge şamamen 10-20 minuttai uaqyt ketedı. Qazırgı taŋda būl qyzmetterdı Smart Astana mobildı qosymşasyna kırıstıru jūmystary jürıp jatyr» dedı äkım. Al «Astana – adaldyq alaŋy» jobasynyŋ jetekşısı Jazira Jylqyşieva 7 aidyŋ nätijesıne säikes, memlekettık qyzmetterdı alu halyqtyŋ äleumettık jaǧynan osal toptaryna jatatyn 2,5 millionnan astam azamat üşın oŋtailanǧanyn aitty.
Alik Şpekbaev Astana äkımdıgınıŋ bılım beru jüiesın sifrlandyru men äkımşılık kedergılerdı barynşa azaitu maqsatynda qabyldaǧan şeşımderı oŋtaily äser etıp jatqanyn aitty. «Astana – adaldyq alaŋy» jobasy memlekettık bılım beru mekemelerındegı qarjynyŋ aşyqtyǧyna jol bastaidy. Ata-analar da jūmysqa belsene atsalyssa deimın» degen ötınışın bıldırdı A.Şpekbaev.
