Nūr-Sūltan qalasy äkımdıgınıŋ qoldauymen E.Rahmadiev atyndaǧy Memlekettık akademiialyq filarmoniiasynyŋ konsert zalynda küişı-kompozitor, Qazaqstannyŋ eŋbek sıŋırgen qairatkerı, «Parasat», «Qūrmet» ordenderınıŋ iegerı, Qazaq ūlttyq öner universitetınıŋ Qūrmettı professory Äbdımomyn Jeldıbaevtyŋ 85 jas mereitoiyna arnalǧan «Kümbırle, küiım, elımde» konsertı öttı.
Konsertke Nūr-Sūltan qalasynyŋ äkımı Altai Kölgınov, elorda mäslihatynyŋ hatşysy Erlan Kanalimov, Jambyl oblystyq mäslihatynyŋ hatşysy Mahmetǧali Sarybekov, Jambyl oblysy Şu audanynyŋ äkımı Säken Arubaev qatysyp, küişı-kompozitorǧa syi-syiapat körsettı.
– Bügın elordamyzdyŋ törınde, osy zalda keremet öner keşı ötıp jatyr. Būl keşke basty sebepker – ataqty küişı, belgılı kompozitor, özımız ardaq tūtatyn Äbdımomyn aǧa. Aǧamyz sanaly ǧūmyryn qazaqtyŋ saf önerı küige arnap, qanşama keremet tuyndylardy qūndy qazynamyzǧa ainaldyrdy. «Naǧyz qazaq qazaq emes, naǧyz qazaq dombyra» degen keremet sözımız bar. Dombyra paida bolǧaly berı qanşama şyǧarma düniege keldı. Qorqyt atamyzdan bastap Tättımbetımız, Dinamyz, Aqan serımız, Ükılı Ybyraiymyz, Jaiau Mūsamyz, Däuletkereiımız bar. Solardyŋ önerın sız jalǧastyryp kelesız, aǧa. Sızge ärdaiym şyǧarmaşylyq tabystar tıleimın! Aramyzda osylai aman jürıŋız! Tuyndylaryŋyz halyqpen bırge jasai bersın! – dedı Erlan Kanalimov.
Äbdımomyn Jeldıbaev jarty ǧasyrdan astam ǧūmyryn mädeniet salasyna, sonyŋ ışınde muzyka önerıne arnap kele jatyr. Osy uaqyt ışınde öz salasynda basşylyq qyzmetterdı atqara jürıp, «Şu erkesı» halyqtyq än-bi ansamblınıŋ negızın qalap, ansambldıŋ respublikalyq, oblystyq festivalderge qatysuyna mūryndyq boldy.
Qazaq elınıŋ küişılık mädenietın özınıŋ töl tuyndylarymen baiytqan küişınıŋ bügıngı künı 70-ten asa şyǧarmalary oryndalyp jür. Sonyŋ ışınde «Erke sylqym» küiınıŋ orny bölek. Būl – şyǧarma öner iesınıŋ tölqūjaty. Osy küi muzyka mektepterınıŋ baǧdarlamasyna myqtap engen. Küige talapker baladan «küi tartyp berşı» dep sūraǧanda, «Erke sylqymdy» bebeulete jöneletının talai körgenbız. Iаǧni, būl küi elımızge keŋ tarap, balaǧa da, eresek adamǧa da süikımdı.
Elordalyq filarmoniiada ötken konsertte «Erke sylqymdy» taǧy tyŋdap, tamsandyq. Filarmoniianyŋ qazaq orkestrı (körkemdık jetekşısı jäne bas dirijerı – Qazaqstannyŋ eŋbek sıŋırgen qairatkerı, professor Aitqali Jaiymov, dirijerı – Mädeniet qairatkerı Nūrlan Bekenov) jäne filarmoniianyŋ belgılı öner şeberlerı küişı-kompozitordyŋ şyǧarmalaryn oryndady. Sonyŋ ışınde «Şabyt», «Äulieata», «Bozjıgıt», «Kökşolaq», «Tolǧau», «Ömır-dastan», «Ädılhan», «Ydyrys», «Samǧau», «Jarylqap batyr», t.b. küilerı men änderı körermenge ūsynyldy.
