Astana qalalyq äkımdıgınde «Sybailas jemqorlyqty jalpyǧa bırdei qabyldamau – bırlık jäne tūraqtylyqtyŋ kepılı» atty döŋgelek üstel öttı. Jiyndy QR Memlekettık qyzmet ısterı jäne sybailas jemqorlyqqa qarsy ıs-qimyl agenttıgı men Qazaqstan halqy Assambleiasy bırlesıp ūiymdastyrdy.
Döŋgelek üsteldı QR Memlekettık qyzmet ısterı jäne sybailas jemqorlyqqa qarsy ıs-qimyl agenttıgı töraǧasynyŋ orynbasary Alik Şpekbaev jürgızdı. Ol sybailas jemqorlyqpen küreste jazalaudan būryn, oǧan tözbeitın mädeniet qalyptastyru kerek ekenın eskerttı. Būl üşın barmaq basty, köz qysty äreketpen qoǧam bolyp jūmylyp küresu qajet.
– Elbasy Nūrsūltan Nazarbaev sybailas jemqorlyqtyŋ sebepterı men alǧyşarttaryn anyqtap, olardy joiu jūmysyn küşeitu turaly tapsyrma bergen bolatyn. Elbasynyŋ soŋǧy Joldauynda sybailas jemqorlyqqa bailanysty qoǧammen jūmys jürgızu kerektıgı naqty aityldy. Būdan bölek, qoǧamda sybailas jemqorlyqqa qarsy mädeniettı qalyptastyru üşın memleket pen azamattyq qoǧam arasynda tyǧyz qarym-qatynas ornatu kerek. Mıne, sol azamattyq qoǧamnyŋ ışınde Qazaqstan halqy Assambleiasynyŋ orny erekşe, – dedı ol.
Qazaqstan halqy Assambleiasy Töraǧasynyŋ orynbasary – QR Prezidentı Äkımşılıgınıŋ QHA hatşylyǧynyŋ meŋgeruşısı Darhan Myŋbaidyŋ aituynşa, jemqorlyq elımızdıŋ damuyna kedergı keltıredı. Sondyqtan da ol sybailas jemqorlyqpen küresude ärbır azamat belsendılık tanytuy kerek ekenın atap öttı.
– Sybailas jemqorlyq elımızge keletın investisiialyq tartymdylyqty bäseŋdetetın keleŋsız qūbylys bolyp sanalady. Sondai-aq, jemqorlyq äleumettık-ekonomikalyq damudy barynşa tejep, ūlttyq qauıpsızdıkke tıkelei qauıp töndıredı. Sondyqtan da täuelsızdıktıŋ alǧaşqy künderınen bastap sybailas jemqorlyqqa qarsy ıs-qimyldyŋ tiımdı, älemdık standarttarǧa sai instituttary men tetıkterın qūru kezeŋ-kezeŋımen jüzege asyrylyp keledı. Mäselen, Qazaqstan TMD elderınıŋ ışınde alǧaşqylardyŋ bırı bolyp Sybailas jemqorlyqqa qarsy küres turaly zaŋ qabyldady, – dedı Darhan Qamzabekūly.
Sondai-aq, jiynda Mäjılıs deputaty Sauytbek Abdrahmanov, Qazaqstan Prezidentı janyndaǧy Memlekettık basqaru akademiiasynyŋ vise-rektory Aigül Köşerbaeva baiandama jasady. Būdan bölek, döŋgelek üstelge teleköpır arqyly qatysqan öŋırlerden Almaty qalasy men Pavlodar oblysynyŋ ökılderı tūşymdy oilaryn ortaǧa saldy.
Serık JOLDASBAI
