JETINŞI MÜŞÄIRA JAMPOZDARY
Keşe «Jastar» teatrynda Astana qalasy äkımdıgınıŋ qoldauymen «EKSPO-2017» halyqaralyq mamandandyrylǧan körmesı men Astana künıne arnalǧan «Qazaqstanym-Ǧajapstanym» atty müşäiranyŋ jeŋımpazdaryn marapattau räsımı öttı. elımızdıŋ är aimaǧynan kelgen 50-ge tarta aqynnan 12 jyr jampozy anyqtaldy.
Atalmyş müşäirany Säken Seifullin mūrajaiy biyl jetınşı märte ūiymdastyrdy. Qazylar alqasyna belgılı jazuşy, ǧalym, Memlekettık syilyqtyŋ laureaty Qoişyǧara Salǧaraūly töraǧalyq ettı. Sondai-aq, qatysuşylardyŋ öleŋderı Nesıpbek Aitūly, Oŋaigül Tūrjan syndy aqyndardyŋ
saraptauynan öttı. Qorytyndysynda bas jüldenı tanymal aqyn, halyqaralyq «Alaş» ädebi syilyǧynyŋ iegerı Ǧalym Jailybai «Ruh jyry» toptamasy üşın ielendı.
Bırınşı oryn Oŋtüstık Qazaqstan oblysy, Maqtaral audanynyŋ tumasy Yqtiiar Myrzaqūlovqa būiyrdy. Qyzylordalyq belgılı aqyn Tolybai Abylaevqa «Jerūiyq» tolǧauy, astanalyq jas aqyn Arman Şerizatqa «Astana» öleŋı üşın ekınşı oryn berıldı.
Almatylyq Ǧalym Qalibekūly «Qazaqstan – mäŋgılık mahabbatym» toptamasymen, astanalyq Oljas Qasym «Ebınei körgen EKSPO», aiagözdık Aqaş Köksegenov «Menıŋ altyn tıregım» tolǧaularymen üşınşı orynnan körındı.
Al Dostyq Tıleubergenov (Qyzylorda oblysy) «Kök tudy süiem», astanalyq aqyndar – Ūlarbek Dälei «Esıl boiyn jaǧalata üi tıktım», Baltabek Nūrǧali «El baqyty – Elbasy», Quat Rahatūly «Arman qala – Astana», Mūqiiat Qoişybai «Gül kömkergen Saryarqa» öleŋderı üşın yntalandyru syilyqtaryna ie boldy.
Amanǧali QALJANOV