Jetkınşekterdıŋ köŋıldı starty
Elordadaǧy SOS balalar auylynda köŋıldı start jarysy öttı.
Baiqau estafetalyq oiyn men qyzyqty konkurs türınde ūiymdastyryldy. Balalardy qoldau üşın Almaty audanynyŋ äkımı Ermaǧanbet Bölekpaev, grek-rim küresınen ekı dürkın älem chempiony, Atlantadaǧy Olimpiada chempiony, Qazaqstannyŋ sport şeberı Iýrii Melnichenko, Afinydaǧy Olimpiadanyŋ kümıs jüldegerı, Londondaǧy Olimpiadanyŋ qola jüldegerı, Rio-de-Janeirodaǧy Olimpiadanyŋ kümıs jüldegerı, Qazaqstannyŋ sport şeberı Güzel Maniurova, kikbokstan ekı dürkın älem chempiony Nūrbolat Rysmaǧanbetov jäne elordalyq bapkerler arnaiy keldı.
– Bügıngı merekege kök bairaǧymyzdy dünie jüzıne tanytqan saŋlaq sportşylarymyz qatysuda. Olar senderge tamaşa ruh pen jeŋıske degen ülken senım syilaitynyna senemın. Ärqaşan denderıŋ sau bolsyn. Oquda tabystarǧa jete berıŋder! – dedı E. Bölekpaev.
Qonaqtar jetkınşekterdıŋ sporttyq tälımgerlerı boldy. Doda barysynda büldırşınderdı qanattandyryp, keŋester berıp otyrdy.
– Osyndai erekşe şaraǧa qatysyp otyrǧanyma öte quanyştymyn. Sport adamdardy ärkez jaqyndastyrady, bırlıkke şaqyrady. Men būrynyraq balalar bapkerı bolyp jūmys ıstegenmın, kışkentailarmen uaqyt ötkızu maǧan qatty ūnaidy, – dep aǧynan aqtaryldy öz kezegınde G. Maniurova.
Būl künnen estelık retınde barlyq qatysuşyǧa syilyqtar ülestırıldı.
Botagöz MARATQYZY