Seisenbı künı bas qalamyzda kütpegen jaǧdai ornap, qaiǧyly jol-kölık apaty boldy. Qala maŋyna qatynaityn №301 avtobus joǧary jyldamdyqpen kelıp, baǧdarşamda tūrǧan avtobusqa soqtyqqan. Saldarynan 53 jastaǧy jürgızuşı men aldyŋǧy qatarda otyrǧan 26 jastaǧy jolauşy oqiǧa ornynda köz jūmsa, 36 adam türlı deŋgeide jaraqat alǧan. Keşe qala äkımı Baqyt Sūltanov pen Densaulyq saqtau ministrı Eljan Bırtanov nauqastardyŋ jaǧdaiyn sūrap, №2 auruhanaǧa bardy. Sonymen qatar «Astana LRT» basşysy Bekmyrza İgenberdiev zardap şekkenderge tölenetın ötemaqy jaily tüsındırıp berdı.
Qala äkımı men ministr är nauqasqa baryp: «Tezırek jazylyp ketıŋız! Sızge bılıktı därıgerler kömek körsetıp jatyr» dep tıleulestıgın bıldırdı.
– Jol apatynan zardap şekken 36 adamǧa medisinalyq kömek körsetıldı. Sondai-aq jeŋıl jaraqat alǧan 8 adam özdıgınen kelıp tekserıldı. Zardap şeguşılerdıŋ arasynda balalar joq. Qazırgı uaqytta bıreuınıŋ jaǧdaiy öte auyr, sol siiaqty 6 adamnyŋ jaǧdaiy auyr jäne 8 adamnyŋ densaulyq jaǧdaiyn ortaşa dep aituǧa bolady, – dedı qalalyq Qoǧamdyq densaulyq saqtau basqarmasynyŋ basşysy Kamaljan Nadyrov.
Al №2 auruhananyŋ bas därıgerı jedel järdem arqyly jetkızılgen bır äiel arqasynan qatty jaraqat alǧandyqtan neirohirurgiia ortalyǧyna auystyrylǧanyn, qalǧan adamdarǧa der kezınde kömek körsetılgenın mälım ettı.
– Keşegı jol apatynan keiın 29 adamǧa kömek körsettık. Al 14 jolauşy tiıstı kömekten keiın üiıne jıberıldı. Özgelerı stasionarda qaldy. Sondai-aq bas-aiaǧy bes ota jasadyq. Nauqastardyŋ üşeuınıŋ jaǧdaiy auyr. Degenmen köbınıŋ jaǧdaiy tūraqty. Sondyqtan olardyŋ ömırıne qauıp joq dep aita alamyz, – dedı bas därıger İvan Li arnaiy ötken baspasöz jiynynda.
Taǧy bır aitarlyǧy, apat kezınde bır äiel otyrǧan ornynda janşylyp qalypty. Bas därıgerdıŋ aituynşa, jaǧdaiy auyr, sebebı ekı aiaǧy qatty myjylyp qalǧan eken.
– Oǧan bırden ota jasadyq. Ökınıştısı sol, oŋ aiaǧyn saqtai almadyq. Ony üstındegı üşınşı jılınşıgınen amputasiialauǧa tura keldı. Bıraq sol aiaǧy qatty synsa da qalpyna keltırdık, ony saqtai alamyz dep oilaimyn. Nauqastyŋ qazırgı jaǧdaiy auyr bolǧanmen, tūraqtylyq baiqalady. Qazır intensivtı em-domdy jalǧastyryp jatyrmyz, – dedı därıger.
Bır quanarlyǧy, aiaǧynan qatty soqqy alyp, jaralanǧandar bolǧanmen, amputasiia otasy bır adamǧa ǧana jasalypty. Aq jeleŋdıler arnaiy fiksasiia jasaityn tehnologiianyŋ kömegımen nauqastardyŋ aiaq-qolyn aman alyp qaludyŋ jolyn qarastyryp otyr.
Nūr-Sūltan äkımdıgınde ötken jiynda «Astana LRT» basşysy Bekmyrza İgenberdiev ärbır avtobus parkı jolauşylar men jüktı tūtas saqtandyratynyn qozǧap ötıp,
ötemaqy kölemı medisinalyq saraptama nätijesı boiynşa berıletının aitty. «Saqtandyru kompaniiasyna habarlasyp, şyǧyn kölemın mälım etemız. Al öz tarapymyzdan apattan köz jūmǧandardyŋ otbasylaryna barlyq qajettı kömek körsetemız» dedı ol.
