«Qazaqstan» ortalyq konsert zalynda Mädeniet jäne sport ministrlıgınıŋ, Nūrsūltan Nazarbaev qorynyŋ jäne Äliia Nazarbaevanyŋ «Jandanu älemı» qorynyŋ qoldauymen ūiymdastyrylǧan «Bala dauysy» än baiqauynyŋ VI mausymynyŋ jeŋımpazy men jüldegerlerı anyqtaldy.
Finalǧa biyl 25 nauryz ben 15 mamyr aralyǧyndaǧy ırıkteu kezeŋınen sürınbei ötken Şymkent, Almaty jäne Nūr-Sūltan qalasy men on tört oblystyŋ 17 jas daryndy önerpazy joldama aldy.
«Bala dauysy» än baiqauynyŋ VI mausymynyŋ jeŋımpazdaryn marapattau räsımıne Mädeniet jäne sport ministrı Aqtoty Raiymqūlova, joba avtory Äliia Nazarbaeva, Nūr-Sūltan qalasy äkımınıŋ orynbasary Ashat Oralov, Nūrsūltan Nazarbaev Qorynyŋ atqaruşy direktory Qanat Jūmabaev, Qazaq ūlttyq muzyka akademiiasynyŋ rektory Aiman Mūsaqojaeva qatysty.
Bırınşı ainalymda «Şeteldık jäne otandyq hit änder» konserttık baǧdarlamasy ötkızılıp, jas änşıler tanymal tuyndylardy İlia Başkatov jetekşılıgındegı toptyŋ süiemeldeuımen oryndady. Al ekınşı kezeŋde, el Täuelsızdıgınıŋ 30 jyldyǧyna jäne «Bala dauysy» jobasynyŋ 5 jyldyǧyna arnalǧan «Tuǧan künıŋmen, bala dauysy!» atty Gala-konsertte balalar aldyŋǧy jyldardyŋ finalisterımen bırge tanymal jäne avtorlyq änderdı şyrqap, ärbır jas qatysuşy öz önerımen jäne käsıbi şeberlıgımen qalyŋ körermendı täntı ettı.
Saiys qorytyndysy boiynşa Bas jülde – Qazaq ūlttyq öner universitetınde oqu grantyn elordalyq Jasmina Tüzelova ielendı. Al bırınşı oryndy Maŋǧystau öŋırınen kelgen Ämina Asǧatova alsa, ekınşı oryndy almatylyq Iýliia Maks pen qaraǧandylyq Viktor Emelianov ielendı. Üşınşı orynǧa – Atyrau oblysynyŋ ökılı Altynai Tölegen, Qyzylorda oblysynyŋ jas änşısı Serık Madiiar jäne Türkıstan oblysynan synǧa tüsken Maiia Bolat jaiǧasty.
Jyl saiyn ondaǧan jas ümıtkerge öner älemıne joldama beretın «Bala dauysy» konkursynyŋ biylǧy ırıkteuıne elımızdıŋ tükpır-tükpırınen 8 ben 12 jas aralyǧyndaǧy 5 583 bala qatysqan.
