Qaraǧandy qalasynda ötken Qazaqstannyŋ halyq ärtısı, Memlekettık syilyqtyŋ iegerı Jüsıpbek Elebekov atyndaǧy dästürlı änderdı oryndauşylardyŋ VII respublikalyq konkursynda Qazaq ūlttyq öner universitetı kolledjınıŋ ūstazy Syrym Mūhamedjanov top jaryp, bas jüldenı enşıledı.
Būl baiqauǧa elımızdıŋ tükpır-tükpırınen jalpy alǧanda 32 ümıtker qatysty. Auqymy da ötken jyldarǧa qaraǧanda keŋ boldy. Osy joly Astana, Almaty, Maŋǧystau, Atyrau, Kökşetau, Jezqazǧan, Balqaş jäne Qaraǧandy öŋırınıŋ qyz-jıgıtterı öner jarystyrdy.
Qazaqstannyŋ halyq ärtısı, professor Qairat Baibosynov bastaǧan qazylar alqasyna da Arqa änınıŋ nebır düldülderı jinaldy. Atap aitsaq, konkursanttarǧa Qazaqstannyŋ eŋbek sıŋırgen ärtısı, Jüsıpbek Elebekovtıŋ soŋǧy şäkırtterınıŋ bırı Ǧalym Mūhamedin, Qazaqstannyŋ eŋbek sıŋırgen qairatkerlerı – Meiırhan Adambekov, Jaqsykeldı Kemalov, Talǧat Ydyrysov baǧa berdı.
«Būdan būryn «Şabyt» festivalı men Ämıre Qaşaubaev atyndaǧy än baiqauynyŋ jüldesın aldym. Al Jüsıpbek Elebekov konkursynyŋ men üşın jönı bölek boldy. Oǧan önerım äbden pısken kezde qatystym. Jalpy, osy konkurstaǧy qarsylastarym da öte myqty boldy. Būl jerde mektep körındı. Baiǧabyl Jylqybaev, Qosymjan Babaqov syndy asqaq änşılerdıŋ osy künderı ūmytylyp bara jatqan qaǧystary jaŋǧyrdy. Jalpy, baiqaudyŋ deŋgeiı öskenı baiqaldy» deidı Syrym Mūhamedjanov.
Konkurstyŋ bır erekşelıgı – onda Qaraǧandynyŋ Kenşıler mädeniet saraiynyŋ atynan Jüsıpbek Elebekov telqoŋyrym dep ataǧan qos şäkırtı Qairat Baibosynov jäne Jänıbek Kärmenov atyndaǧy qos syilyq tapsyryldy. Ekeuın de astanalyq örender – Däuletkeldı Saǧatov pen Sūltan Tıleubekov aldy. Biyl 350 jyldyǧy atap ötılgen Qazybek bi atyndaǧy jülde de iesın tapty.
Jalpy, astanalyqtar osy konkurstan bıraz oljaǧa keneldı. Qazaq ūlttyq öner universitetınıŋ studentterı Meiırhan Nūrjan – üşınşı jäne Aiaulym Qamajan ekınşı oryndy qarsylastarymen bölıstı. Būl oqu ornynyŋ taǧy bır studentı Azat Äbdıǧalym bırınşı oryndy aldy.
Amanǧali QALJANOV
