Qala äkımınıŋ orynbasary Altynbek Qaisaǧalievtıŋ töraǧalyǧymen jäne QR Prezidentı äkımşılıgınıŋ memlekettık inspektory Maqsūt İsahovtyŋ qatysuymen elordanyŋ 2019-2020 jylǧy jylu beru mausymyna daiyndyǧy boiynşa ştab otyrysy öttı.
Kün tärtıbıne qoiylǧan mäsele törteu: Nūr-Sūltan qalasynyŋ jylu beru mausymyna daiyndyǧy barysyndaǧy problemalyq mäseleler; bılım beru jäne densaulyq saqtau nysandarynyŋ äzırlıgı; «Astana-energiia» AQ-tyŋ mausymǧa daiyndyǧy, onyŋ ışınde jöndeu jūmystary men investisiialyq baǧdarlamalardyŋ jüzege asyryluy; örtke qarsy şaralar.
Qalalyq Otyn-energetikalyq keşenı jäne kommunaldyq şaruaşylyq basqarmasynyŋ basşysy Erbol Töleuovtıŋ aituynşa, 2019-2020 jylǧy jylu beru mausymyna daiyndyq belgılengen keste men karta rejimıne säikes jürgızılıp jatyr. Şahardy elektrmen jäne jylu beru jüiesımen jabdyqtaityn JEO-1 men JEO-2, odan bölek taǧy 6 qazandyqtyŋ qysqy äzırlıgı – 53%.
Jaryq beru boiynşa jauapty «Astana REK» AQ qys mausymyna 64,4 paiyzǧa daiyn. 40 densaulyq saqtau ūiymdarynyŋ 14-ı, 180 bılım beru ūiymdarynyŋ 83-ı jylu beru mausymyna äzır. Qala ırgesındegı eldı mekenderdıŋ qysqy daiyndyǧy – 47,3%.
«Bügınde bız 8 ırı kömırmen jabdyqtauşymen otyn baǧasyn kötermeu turaly memorandumǧa qol qoidyq. Sonymen qatar, halyqqa kömırdı qazırden bastap satyp ala beru kerektıgın aityp, tüsındırme jūmystaryn jürgızıp jatyrmyz» dedı E.Töleuov.
Biylǧy jyly kömırge tapşylyq joq. Qazırgı künı qorda tūtynudan bölek 316 myŋ tonna kömır, 8,8 myŋ tonna mazut bar.
Degenmen şeşılmei jatqan tüitkılder de bar.
«Qaladaǧy kommunaldyq şaruaşylyqpen «Astana Energosbyt» JŞS ainalysady. Bügıngı künı būl ūiymǧa jylu jäne jaryq boiynşa tūrǧyndardyŋ ötelmegen bereşegı 1 mlrd 734 mln teŋgenı qūrap otyr» dedı basqarma basşysy.
Odan bölek, «Astana-Teplotranzit» AQ jüiesı boiynşa memlekettık satyp aluǧa qatysyp, tenderdı jeŋıp alǧan kompaniialar ol jūmystardan bas tartqan.
Jinalys soŋynda qala äkımınıŋ orynbasary A.Qaisaǧaliev audan äkımderıne barlyq problemalyq mäselelerdı jylu beru mausymyna deiın tolyqtai şeşıp bıtırudı tapsyrdy.
