Jyljymaityn mülıktı biznes maqsatynda qoldanu üşın tūrǧyn üi qorynan qalai şyǧaruǧa bolady?
Bızdıŋ keŋesşıler – Nūr-Sūltan qalasynyŋ Säulet, qala qūrylysy jäne jer qatynastary basqarmasy basşysynyŋ orynbasary Anton Maksimov jäne «Azamattarǧa arnalǧan ükımet» memlekettık korporasiiasy» filialynyŋ Nūr-Sūltan qalasy boiynşa PR menedjerı Ainūr Jaqanova.
1-qadam. Nūr-Sūltan qalasynyŋ Säulet, qala qūrylysy jäne jer qatynastary basqarmasyna baryp osy üide qaita öŋdeu jūmystaryn jürgızuge bola ma, sondai-aq elektr, bailanys jelılerı, qūbyrlar, avtokölık joldary, basqa da ǧimarattar bar ekenın körsetetın qyzyl syzyq ötpei me, basqa da menşık ielerıne ziiany timei me, sony bılıp alǧanyŋyz jön.
2 -qadam. Seismologtyŋ qorytyndysyn, topografiialyq tüsırılım jäne säulettık jobalau jūmysyn (APZ) alu kerek. Eger Säulet basqarmasy osy tüitkıldı mäselege oŋ şeşımın berse, päterdı satyp aluǧa şeşım qabyldauǧa bolady. Odan keiın seismologiialyq qūrylys jönındegı attestasiiadan ötken mamannan qūrastyrylymnyŋ jaǧdaiy (konstruksiia) jäne qaita jobalau mümkındıkterı turaly saraptamalyq qorytyndyny alu kerek. Jobalauǧa bailanysty topografiialyq tüsırılımdı jäne SJJ-ny (APZ) aluǧa tapsyrys berıp, qūjat ötkızudı de qabattasyp jürgızgen jön. Öitkenı topografiialyq tüsırılım berılgen künnen bastap belgılı bır merzım alty aiǧa berıledı. Sondyqtan jer uchaskesıne qūqyq beretın qūjatty retteu üşın qūrylys jūmysy bıtkennen keiın qaitadan tapsyrys beresız. SJJ-ny säulet organdarynda «Azamattarǧa arnalǧan ükımet» memlekettık korporasiiasy» front-keŋselerınen nemese elektrondy ükımetten aluǧa bolady.
3-qadam. Körşıler kelısımın alu kerek. Päterge, oryn jaiǧa naqty yntyzary bar ǧana päter ielerınıŋ notarialdy kuälandyrylǧan kelısımın alu kerek. Bıraq kei jaǧdailarda köppäterlı tūrǧyn üi organdarynyŋ jarǧysyna qaramastan, menşık ielerınıŋ 70 paiyzynyŋ kelısımı qajet boluy mümkın.
4-qadam. Jobaǧa tapsyrys berıp, säulet organdarymen kelısu kerek. Jobaǧa täuelsız saraptama jürgızıp, merdıgerdı anyqtap, avtorlyq jäne tehnikalyq baqylaumen kelısımşartqa otyru. Nysannyŋ qaita öŋdeu jobasyn (qaita jabdyqtau, jaŋadan josparlau) lisenziiasy bar mekemeler men mamandardan alǧan dūrys. Daiyn jūmys jospary säulet organdarymen kelısılıp, täuelsız saraptamany ötu kerek. Merdıger, iaǧni qūrylys-montaj jūmystaryn jürgızetın brigada da lisenziiasy boluy şart. Avtorlyq jäne tehnikalyq baqylau qūrylys jūmystary bıtkennen keiın sapaly oryndalǧany jönınde deklarasiiaǧa qol qoiady.
5-qadam. Qalalyq orta sapasy jäne baqylau basqarmasyn habardar etıp, qūrylys-montaj jūmystaryn jürgızu. Jobalyq-smetalyq qūjattar kelısılıp, täuelsız saraptama jäne säulet organdary oŋ qorytyndy berıp, merdıger anyqtalyp, qūjat jinau kezeŋı aiaqtalsa, oryn jaidy qaita öŋdeu jūmysyna kırısuge bolady. Qūrylys bastalar sätte elicense.kz tırkelıp, Qalalyq orta sapasy jäne baqylau basqarmasyna jūmystyŋ bastalǧany jönınde habar berıledı. Habar alynǧany jönınde talon alǧannan keiın baryp jūmysqa kırısesız.
6-qadam. Paidalanuǧa qabyldau aktısın räsımdeisız. Qabyldau üderısı tapsyrys beruşımen, merdıgermen, tehnikalyq jäne avtorlyq baqylaumen jüzege asady.
7-qadam. Jer ülesın satyp alu. Tūrǧyn üi qorynan şyǧaru jūmysynyŋ qorytyndy kezeŋı menşıkke nemese jalǧa satyp alu. Ol üşın menşık iesı qūjat toptamalaryn aparyp qalalyq äkımşılıkke aryz jazuy tiıs. Būl jerde sız menşıkke oryn jaidan şarşy metr alasyz, janama qūrylys saluǧa emes. Köbısı mäselenıŋ osy arasyn şatastyryp alyp jatady. Onsyz tūrǧyn emes oryn jailardy tırkeu qūqyn ala almaisyz. Al zaŋ boiynşa tūrǧyn jai ielerı jerdı satyp aluǧa qūqy joq. Sız ädılet organdarynda tūrǧyn jai emes dep tırkelgenge deiın ol päter tūrǧyn jai retınde tırkeude tūrady. Kei jaǧdaida menşık ielerı qūrylys-montaj jūmystaryn jürgızıp, paidalanuǧa berılgennen keiın barlyq kezeŋ bıttı dep oilaidy. Nätijesınde özınıŋ mülkıne ökım ete almai qalady. Kei jaǧdailarda säulet organdarynyŋ qalauyna qarai qaita öŋdeuge SJJ-ny uchaskenı satyp nemese jalǧa alǧannan keiın beredı.
8-qadam. Nysandy menşıkke alu qūqyǧyn tırkeu turaly barlyq qūjattardy Halyqqa qyzmet körsetu ortalyǧyna tapsyru kerek. Ötınışıŋız Säulet basqarmasyna jäne Qalalyq orta sapasy jäne baqylau basqarmasyna, sodan keiın Jyljymaityn mülık basqarmasyna tüsedı. Soŋynda «menşık iesı tırkeldı» degen belgısı bar paidalanuǧa qabyldau aktısın qolyna alady.
Sarapşylar osy atalǧan kezeŋderdıŋ barlyǧyn ötuge keŋes beredı. Äitpese sızge aiyppūl salynuy mümkın. Qūjat jinau köp uaqytty alyp qolbailau bolatynyna qaramastan, bolaşaqta zaŋ aldynda mäsele tuyndamas üşın osy qadamdardy būljytpai oryndaǧanyŋyz abzal.
Beibıt OSPAN
