Елордадағы Л.Гумилев атындағы Еуразия ұлттық университетінің журналистика факультетіне биыл түскен түлектер «Elorda Aqparat» ЖШС қарасты республикалық қоғамдық-саяси «Астана ақшамы» газетінің ұжымымен кездесіп, тағылымға толы әңгіме өрбітті.
Шараны аталған оқу ордасының журналистика және саясаттану факультетінің деканы, белгілі ғалым Қайрат Сақ жүргізіп отырды. Жүздесу форматы сұхбат түрінде өрбіді. Тәжірибелі журналистер мен болашақ журналистер еркін ой бөлісіп, пікір алысты. Бүгінгі мәртебелі мамандықтың уақыт талабына сай өзгеріп жатқан даму үрдісіне тоқталды.
Алдымен сөз тізгіні «Elorda Aqparat» ЖШС директоры Қайсар Жұмабайұлына тиді. Ол жетекшілік жасап отырған ұжымның қызметіне тоқталды.
– Біздің серіктестік өткен жылдың аяғында құрылып, оған «Астана ақшамы» мен «Вечерняя Астана» атты екі газетті қосып, алдағы таңда жақсы бір медиа ресурсқа айналу үшін қазір сайтты қолға алып жатырмыз. Одан бөлек, elorda.info деген сайт жұмысын бастады. Алдымызда әлі жүзеге асырсақ дейтін жоспарларымыз бар. Оны кезі келгенде сіздерге айтамыз. Осындай шара ұйымдастырған журналистика факультетінің ұжымына алғысымды білдіремін, – деді ол.
Бүгінде бас қаладағы аты көпке танылған университеттің журналистика факультетінде 600-ге жуық жас оқиды. Онда білім алып жатқан студенттер есімдері елге белгілі Намазалы Омашұлы, Ғаділбек Шалахметов, Рабиға Аманжолова, Оңайгүл Тұржан секілді ұлағатты ұстаздардан тәлім алады. Биыл 1-курсқа 200-ге тарта студент қабылданған. Олардың ішінде 27 түлек орта мектепті «Алтын белгімен» бітірген.
«Біздің факультетіміз университеттегі ең жас саналады. Соған қарамастан, журналистика мамандығының бәсі жоғары. Біріншіден, осында мықты кадрлар шоғыры қалыптасты. Екіншіден, республиканың барлық аймағынан келген талантты жастар жиналған. Былтыр бізге бөлінген грант саны 90 болса, биыл ол 75-ке түсті. Соның әсерінен конкурс күшейді. Аз грантты ұтып алу үздіктерге ғана бұйырады. Материалдық базамыз да мығым. Екі телестудия жұмыс істейді. Мұндай жүздесулердің берері көп. Біз осылай өстік. Адамға ой салады, шығармашылық тәжірибе жинақтайды» деді факультет деканы.
«Астана ақшамы» газетінің бас редакторы Еркін Қыдыр басылым тарихы мен қоғамның дертін тап басатын мамандықтың қыр-сырын жастарға әңгімелеп берді.
– Біздің газеттің жасы салыстырмалы түрде алғанда онша көп емес. Алдағы екі-үш жылда басылымға отыз жыл толады. «Ақмола ақиқаты» деп алғаш тұсауын кескен газет қала бас шаһарға айналғаннан кейін «Астана ақшамы» атын иеленді. Мен де сіздер секілді журналистика факультетін бітіргенмін. Кешегі нөмірде Қазақ ұлттық өнер университетінің 1-курс студенті Еңлік Егеубаеваның әнші Қайрат Нұртас қаржыландырған «Арман» атты фильмі туралы сын мақаласы жарық көрді. Соны біз әдейі бердік. Кино жайында айтқан жастың өз пікірі. Біз де осы мектептен өттік. Журналистика мамандығын қалағаннан кейін сіздер алдағы өмір жолдарыңызды таңдап тұрсыздар. Оның бәрі 1-курстан бастау алады. Үлкен өмірдің алғашқы қадамы содан көрінеді. Біз топты орыс-қазағы бар елу шақты бала бітірдік. Сол бірінші курста редактор боламын деп талпынғандардың көпшілігі білікті редактор болды. Сондықтан алдарыңызға үлкен мақсат қойсаңыздар, алынбайтын қамал жоқ. Ең алдымен журналист ойлана білу керек, тақырып таба білу керек, жаза білу керек. Жақсы журналист газетте де, теледидарда да, сайтта да жақсы көрінеді. Өзінің ойы мен айтары бар адам ешқашан жерде қалмайды. Алғашқы іргетас жазудан қаланады. Кімнің жазуы жақсы, соның шығатын биігі де жоғары, – деді бас редактор.
Газет шолушысы Гүлмира Аймағанбет те басылымға тәжірибеден өтуге келетін студенттер мен кейінгі кездері жүзеге асып жатқан басылымдағы іргелі өзгерістер туралы айтты. Газетке жазылу туралы да сөз қозғалды. Мәселен, кафедра меңгерушісі А.Есдәулетов жатақханадағы бір бөлмеде тұратын 3-4 бала бірігіп, басылымға жазылуды қолға алуға болады деген ой тастады.
Қысқасы, кездесу барысында студенттер бүгінгі журналистерді толғандыратын түрлі тақырыпта сұрақтар қойып, өздерін мазалаған мәселелерге келген қонақтардан тиянақты жауап алды.
Азамат ЕСЕНЖОЛ
