«Право» қоғамдық қоры мен «Уақытша тұру орталығы» ЖҚ бірлесіп, «Әйелдер мен балалардың құқығы» деген тақырыпта көшпелі әлеуметтік бюро өткізді. Сондай-ақ, «Керуен» сауда-ойын-сауық орталығында №71 мектеп-лицей оқушыларының қатысуымен флешмоб ұйымдастырылды.
Аталған қоғамдық қордың заңгері Ақнұр Исаеваның айтуынша, ұйым балалар мен әйелдерді қылмыстың барлық түрінен қорғауға күш салады. Мәселен, ол жұмыс барысында жыныстық қол сұғушылық жиі кездесетінін алға тартып отыр.
– Біздің қоғамдық ұйым кәмелеттік жасқа толмаған жасөспірімдер мен әйелдерге көмек көрсетеді. Бүгінгі шараның мақсаты балалар мен әйелдердің құқығына қол сұғушылықтан қорғау болып отыр. Өйткені қоғамда әлі де болса балалар мен әйелдерге әртүрлі қысым көрсететін оқиғалар кездесіп жатады. Халықпен көп кездескенде байқағанымыз, биыл аталған азаматтардың құқығына қол сұғушылық көбейіп отыр. Ал бүгінгі іс-шарамызға 24 мекеме мен ұйымдардың өкілдері қатысып, олар жәбір көргендерге өздерінің кеңесін береді, – дейді Ақнұр Болатқызы.
Акцияға қалалық Денсаулық сақтау басқармасынан бас-тап, адвокаттар алқасы президиумына дейінгі бас-аяғы 24 мекеме қатысып, өз кеңестерін берді. Негізі, қоғамдық қордың басты ұраны «Сіздердің проблемаларыңыз бар ма? Келіңіз, бірге шешейік!» деп аталады.
Серік ҚҰДАЙБЕРГЕНҰЛЫ
