Тиісті заңға сәйкес, 26 наурыз күні мәслихаттардың шығып қалған депутаттарының орнын толтыру мақсатында елімізде сайлау өтеді. Осыған орай кеше ҚР Орталық сайлау комиссиясының төрағасы Берік Имашев пен Астана қаласы әкімінің орынбасары Ермек Аманшаев қаладағы №20 сайлау округінде болып, сайлау комиссиялары жұмысы мен сайлау учаскелерінің дайындығымен танысты.
Мәслихаттар сайлауы бір уақытта мемлекетіміздің 58 сайлау округінде ұйым-дастырылады. Босап қалған орындарға 201 кандидат өтініш берсе, олардың 188-ін сайлау комиссиялары тіркеді. Тиісті талдау жүргізілгенде, бір орынға үш кандидаттан келетіні анықталды. Олардың жасының орташа көрсеткіші – 40 жас.
№20 сайлау округіне келсек, депутаттық мандатты иеленуге 7 үміткер өтініш берген. Кейіннен екеуі өтініштерін қайтарып, қорытындысында 5 адам тіркелді. Олардың біреуі «Нұр Отан» партиясының, біреуі Қазақстанның Коммунистік халық партиясының мүшелері болса, үшеуі еш партияда жоқ.
Осында тіркелген кандидаттардың арасында қырық жасқа жетпегендер де бар екен.
Сайлау комиссиялары мүшелерімен кездескен Берік Имашев елімізде жүргізілген конституциялық реформаға сай сайлау науқаны алдында тұрған міндеттерге тоқталды. Жүздесу барысында түйткілдер де қозғалмай қалған жоқ. Мәселен, сайлау науқаны кезінде комиссия мүшелері түннің бір уағына дейін және демалыс күндері де жұмыс істейді. Осы жұмыс үшін ең минималды жалақының үшке көбейткен қосындысын алады. Алайда негізгі жұмыс орнындағы жалақыны алмайды.
Астана қалалық Сайлау комиссиясының төрағасы Игілік Жалбыров учаскелік сайлау комиссия мүшелерінің саны 7 адамнан тұратынын, олар қыруар жұмыс атқаруға мәжбүр екенін айтып, олардың санын көбейту жөніндегі ұсынысын жеткізді.
«Аталған мәселелерді терең талқылау керек. Олар бюджеттің қосымша шығындары мен тиісті заңнамаға өзгерістер енгізуді қажет етеді. Бұл болашақтың жұмысы деп ойлаймын» деді Берік Имашев.
Бұдан өзге де бірнеше ұсыныстар айтылып, тиісті жауаптар берілді.
Аманғали ҚАЛЖАНОВ
