Жылдан-жылға халқы көбейген Астанада бұқаралық спортқа баса көңіл бөлінген. Бұл елорда әкімдігінің «20 нақты бастама» жобасының ең бірінші қадамында да нақтыланды. Жұрттың дене шынықтыруға ден қоюына бастайтын істің басы – спорт инфрақұрылымдарын дамыту. Мысалы, шаһардағы «Алау» мұз айдыны сарайы арқасында конькимен сырғанауды әуес көретін тұрғындардың қатары көбейіп келеді.
Алты жасар «Алау»
Ашылғанына жақында ғана алты жыл толған «Алау» бұл күнде елордалықтардың қолдары қалт етсе, жинала қалатын қалаулы орындардың біріне айналды. Әлемдік стандарттарға сай жабдықталған мұз сарайының бүгінгі тыныс-тіршілігі туралы бізге аталмыш спорт кешенінің директоры Сауырбай Есжанов егжей-тегжейлі әңгімелеп берді.
– Соңғы жылдары халық арасында қысқы спорт түрлеріне деген қызығушылықтың артып келе жатқаны байқалады. Оған, әрине, біздің мұз сарайының ықпалы мол десем, қателеспейтін шығармын. Бұл сөзімді нақты деректермен де айғақтай аламын. Мәселен, осыдан үш-ақ ай бұрын, желтоқсан айында «Алаудың» алты жылдығын атап өттік. Осынау жылдар аралығында спорт кешеніне келушілердің саны жарты миллионнан асып кетті. Ең алғаш кешен пайдалануға берілгенде бір айдың ішінде 7 543 адам мұз айдында сырғанады. Бұдан кейін бұл көрсеткіш еселене түсті. Келесі жылы жалпы 42 201 адам «Алауға» ат басын бұрса, бір жылдан кейін, дәлірек айтсам, 2013 жылы 90 041 адам келген. Ал 2014 жылы келушілер саны, тіпті, 151 441-ге жетті, – деді Сауырбай Көлібайұлы.
Спорт кешенін бұқаралық ортаға айналдыру үшін жеңілдіктер де қарастырылған. «Алау» жеті жасқа дейінгі балаларды, көп балалы отбасы мен балалар үйінің тәрбиеленушілерін және бірінші, екінші топтағы мүгедектерді тегін қабылдауға әрдайым дайын. Сондай-ақ, зейнеткерлер, студенттер және үшінші топтағы мүгедектер 50 пайыздық жеңілдікпен мұз айдынына бас сұға алады.
Сонымен қатар, былтыр жалпы билеттердің бағасы 500 теңгеге арзандатылған. Бұл келу-шілердің көбеюіне айтарлықтай әсерін тигізіпті. Дәлірегі, айдындағы ағайынның қарасы 2000-3000 адамға артқан.
Орталық басшысының айтуынша, қазір мұз сарайына қай ауданның тұрғындары аз келетіні анықталып, сол бойынша жұмыстар жасалып жатыр екен. Жүргізілген сараптамалар нәтижесінде келушілердің 68 пайызы Есіл ауданының тұрғындары екені белгілі болды. Бұл тұрғыда қалған аудандардың жұрты белсенді болмай тұр: Алматы ауданы – 12%, Сарыарқа ауданы – 10%. Енді осы аудандардың тұрғындарын көптеп тарту жағы қолға алынып жатыр. Оған қоса, келушілердің 2%-ын құраған шалғай аймақтардың халқына да мән берілмек.
«ЭКСПО» кезінде мұз ерітілмейді
Алау – «жылдам мұз» дайындауға қауқарлы, заманауи жоғарғы технологиялық құрал-жабдықтармен жабдықталған, әлемдік деңгейдегі мұз сарайы. Бірегей кешен – Астанадағы сәулеті көз тартарлық ғимараттардың бірі. Биылғы айтулы «ЭКСПО» көрмесінің қарсаңында бұл мұз сарайының есігі қысқы спортқа қызығушылар үшін де ашық болмақ. Яғни, жаздың аптап ыстығында да «Алаудың» мұзы ерітілмейді. Бұл туралы бізге орталықтың директоры Сауырбай Есжанов мәлімдеді.
Халықаралық көрмеге орай, осы маусымда мұз айдындары да ерекше бедерленді. Жаппай сырғанауға арналған негізгі айдында «ЭКСПО» логотипі мен ұлттық ою өрнектер көрініс тапты. Осы уақытқа дейін бұл айдындар тек бір түрлі өрнекпен зерленіп келген.
Біздің елге таңсық бұл мұз төсеу технологиясын қазір өзіміздің қаракөздеріміз де меңгеріп алыпты. «Алау» алғаш ашылғанда бұл жұмыс тек голландиялық мамандарға сеніп тапсырылған. Келе-келе солардың жандарында қолғабыс боп жүрген өзіміздің азаматтар бұл істі біржола өздерінің қолдарына алған. Солардың бірі – Сағындық Жолшыбеков есімді маман.
– Мен осында жұмыс істеп жүргеніме алты жылдан асты. Яғни, «Алау» «Алау» болғалы осындамын. Басында мұз төсеуді голландиялық мамандармен бірге көмектесе жүріп атқаратынбыз. Қазір бұл шаруаға толығымен өзіміз жауап береміз. Жыл сайын тәжірибеміз толысып, басқа аймақтардан да сұраныс болып жатыр. Мысалы, жақында Алматы қаласында өткен Универсиада кезінде арнайы барып қызмет еттік. Жалғыз біз емес, жан-жақтан түрлі тісқаққан мамандар жиналды. Әрқайсысының өзінің мұз құю құпиясы болады, – деді ол.
Сонымен қатар, мұнда жылдағы дәстүр бойынша 1 мамырдан бастап жазғы орталық жұмыс істейді.
Балалардың тұсауы мұз айдынында кесіледі
Демалыс күндеріне қоса, мереке күндері «Алау» мұз сарайы түрлі іс-шараларды ұйымдастыруға ұйытқы болып жүр. Бұл бұқараның спортқа бет бұруына оң ықпал ететіні сөзсіз. Енді алдағы «Наурыз» мейрамын да ерекше атап өтуді жоспарлап отыр.
Ұлыстың ұлы күніне арналған қызықты шаралар 17 наурыздан басталады. Осы күні «Алаудан» табылғандар «Домбыра Party» думанын тамашалап, ұлттық аспапта ойнай алса, өздерінің өнерін де тарту ете алады. Сонымен қатар, Танюша есімді бүлдіршіннің емделуіне қажет қаражатты жинау үшін қайырымдылық шарасы өткізіледі.
Жұмыс күні болғандықтан, бұл күні жаппай сырғанау үшін үлкен айдын кешкі сағат 19.00-ден бастап көпшіліктің игілігіне жарайды.
Келесі күні «Алауға» ат басын бұрғандардың арасында конькимен сырғанаудан жарыс өтеді. 100 метр қашықтықта жүйрік шыққандарға жаппай сырғанаудың билеттері үлестіріледі. Оған қоса, #Alauspring хэштегімен Инстаграм арқылы мұз айдындағы үздік суреттерге бәйге жарияланады. Бұған белсенді атсалысқандардың фотолары LED-экрандардан көрсетіледі.
19 наурызда «Асық Party» атты асық атудан жарыс ұйымдастырылады. Бұл ойында көпшілікпен бірге, Қаллеки театры мен «Жастар» театрының актерлері бақтарын сынап көрмек.
Одан кейін үш күн бойы суретшілер қауымы өз туындыларын ұсынады. Сондай-ақ, «Қара жорға» биін билеуден флешмоб өтеді.
Ал 22 наурыз күні «Светоч» балалар үйі тәрбиеленушілерінің «Алауда» тұсауы кесіледі. Бұл рәсімге жазушы, ілеспе аударманың шебері Қамал Әлпейісова қатысады. Кішкентайлар алғашқы қадамдарын мұзда басып, конькимен сырғанауды жайлап үйрене бастайды. Оған қоса, «Қыз қуу» ойыны да ұйымдастырылады.
Жалпы мерекелік шаралар 26 наурызға дейін жалғасын табады. Белсенді тұрғындарға «Наурызнама» сыйлықтары таратылады. «Алаудың» есігі келем деушілерге әрқашан айқара ашық.
Орынбек ӨТЕМҰРАТ
