Наркескен намысты Абылай
Жастар театрында алты алаштың абызы – Әбіш Кекілбаевтың «Нартәуекел» драмасының тұсауы кесілді. Қойылым жазушының туған күні мен тәуелсіздікке тамаша тарту болды.
Спектакль ел басына күн туған шақта үш жүздің басын қосып, елдің елдігін сақтап қалған Абылай хан жайлы. Тақ деген бір қу таяқ екенін, шайқастан шайылатын кез келгенін түсінген Абылай енді бітімгерлік жолмен жүруге шешім қабылдайды. Әуелде Сабалақ, кейін кемеңгерлігінің арқасында Абылай хан атанады. Қойылымда бала Абылайды театрдың жас әрі талантты актері – Шыңғыс Жақыпбай, Дана Абылайды Мемлекеттік «Дарын» Жастар сыйлығының лауреаты, белгілі актер Әділ Ахметов ойнайды. Оқиға желісінде ел тағдыры жеке адамның тағдырымен сабақтасады, сонысымен де көрерменді қызықтырады.
Драманың қоюшы режиссері – Қазақстанның еңбек сіңірген қайраткері Нұрқанат Жақыпбай кездескен қиыншылықтар жайлы баяндап берді:
– Әбіш ағаның тілі күрделі, сөзі салмақты. Күні-түні ұйықтамай тәптіштеп оқыдық, жақсы шығаруға тырыстық. Бұл – елімізге, халқымызға, көрерменге өте керек дүние. Жастардың рухын көтеріп, отаншылдыққа тәрбиелейтін қажетті шығарма, – деді ол.
Қойылым соңында Жастар театрының ұжымына Астана қаласы әкімі Әсет Исекешевтің атынан ықылас гүлі табысталды.
Гүлдана ТАЛҒАТҚЫЗЫ