Орталық сайлау комиссиясының төрағасы Нұрлан Әбдіров 14 қаңтарда өтетін Сенат сайлауына 55 үміткер қатысатынын мәлімдеді.
«Сайлау комиссияларының ұсынылған деректеріне сәйкес, сайлау бюллетеньдеріне 55 үміткер енгізілді. Алматы қаласында – 4 үміткер, 6 өңірде: Алматы, Жетісу, Жамбыл, Павлодар, Солтүстік Қазақстан, Түркістан облыстарында – 2 үміткерден. Қалған өңірлерде және Астана, Шымкент қалаларында 3 үміткерден қатысады. Республика бойынша таңдаушылар тізіміне мәслихаттардың 3168 депутаты енгізілген. Ең көп сан Түркістан облысында – 317 және Қостанай облысында – 263, ал ең азы Астана – 31, Шымкент – 30 және Алматы қалаларында – 38» деді Н.Әбдіров құзырлы органның отырысында.
Сенат төрағасы Мәулен Әшімбаев әр өңірден бір-бір депутаттан сайланатынын мәлім етті.
«14 қаңтарда сайлау өтеді. Осы орайда 20 сенатор сайланатын болады. Әр өңірден бір депутаттан келеді. Қазір 20 орынға 64 үміткер тіркелген. Демек, бір орынға 3 адамнан келіп тұр. Бұл өз кезегінде бәсекелестік бар екенін білдіріп отыр. Осы 64 үміткердің арасында 30 пайызы әйел адам екені – құптарлық үрдіс. Үміткерлердің төртеуі – қазіргі сенаторлар» деді М.Әшімбаев Сенат отырысынан кейін журналистердің сауалына берген жауабында.
