Астанада Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы аясында биыл 500 адамға арналған қайта даярлау курстарын ұйымдастыру жоспарланған. Осыған орай қала әкімінің орынбасары Андрей Лукиннің төрағалығымен жұмыспен қамту бойынша ведомствоаралық комиссияның отырысы өтті.
Елорданың еңбек нарығында сұранысқа ие мамандықтарға оқуға жіберу мәселесін қараған комиссия білім беру ұйымдарының өтініштері мен ұсынған жобаларымен танысты. Қорытындысында ағымдағы жылы тегін оқыту курстарынан өтетін мамандықтарды анықтады.
Сонымен, бас қалада мектеп алды даярлау ұйымдарының тәрбиешісі, наубайшы, аспаз, тігінші, шаштараз-ұста, электргаздәнекерлеуші, электр құрылғыларына қызмет көрсету және жөндеу бойынша электромонтер, сауда менеджері, қадағалаушы-кассир, даяшы жетіспейтіні белгілі болды.
Сондықтан осы жылы Астана қаласының Халықты жұмыспен қамту орталығы қысқа мерзімді қайта даярлау курстарын ұйымдастырады.
Жиында қысқа мерзімдік оқыту курстарын өткізуге 14 білім беру ұйымы мен орталықтары өтініш бергені анықталды. Нәтижесінде комиссия олардың 8-ін іріктеп алды. Енді Астана қаласының менеджемент және бизнес колледжі, Еуразия гуманитарлық институтының колледжі, Астана қаласы әкімдігінің көпбейінді колледжі, Басқару колледжі, Іскер бизнес академиясы, Шаштараз мектебі, Ақмолалық оқыту курстық комбинаты, Бухгалтерлер үйі орталығы базаларында жұмыссыздар қысқа мерзімді қайта даярлау курстарынан өтетін болады.
