Елбасы халыққа Жолдауында «… біз ең ұсақ құқық бұзушылықпен, бұзақылықпен ымыраға келмеуіміз керек. Өйткені осының өзі қоғам тыныштығын бұзады, өмірдің сапасына селкеу түсіреді» деген болатын.
Расында да, тәртіп пен ішкі мәдениет ақсаған жерде үлкен олқылықтарға жол берілетіні белгілі. Міне, осындай келеңсіздіктердің алдын алып, болдырмау мақсатында Астана қаласының қоғамдық тәртіп сақшылары кешенді түрде ауқымды іс-шараларды жүзеге асыруда.
Соның бірі – кеше Сарыарқа ауданы Ішкі істер басқармасының ғимаратында «Елордадағы қауіпсіздік пен жайлылық» аясында өткізілген көшпелі сот отырысы.
Судья Әйгерім Сәдуақасованың төрағалығымен өткен сот отырысында Қазақстан Республикасы Әкімшілік құқық бұзушылық кодексінің 434-бабы бойынша ұсақ құқық бұзушылық жасаған 12 адамның ісі қаралды. Осы жауапкершілікке тартылып тұрған жап-жас жігіттердің барлығы да қоғамдық орындарды ластап, бейәдеп сөздер айтқан немесе біреудің орынсыз жеке басына тиісіп, балағаттағандар. Рас, қателіктерін мойындап отыр.
Ал неге ондай тәртіп бұзушылыққа барғандығын сұрағанда, «солай болып қалды» деп иығын көтергеннен басқа ештеңе айта алмады.
Сонымен, Астана қаласы прокуратурасынан прокурор Қанат Әбдихановтың қатысуымен өткен көшпелі сот отырысында он бір адамға он айлық есептік көрсеткіш көлемінде айыппұл салынып, бір адам бір тәулікке қамауға алынды.
Сот отырысына ішкі істер органдарында есепте тұрған адамдар шақырылып, отырыс соңында судья Ә.Сәдуақасова олармен «Ұсақ бұзақылыққа мүлде төзбеушілік» тақырыбында әңгіме өткізді.
Астана қаласы Ішкі істер департаменті Жергілікті полиция қызметкерлері жыл басынан бері 434-бап бойынша құқық бұзған 1248 адамға әкімшілік хаттама толтырып, олардың 66-сы жеті тәулікке дейінгі мерзімге қамауға алынған. Ал 1182-сіне айыппұл салынған.
Таңатар ТӨЛЕУҒАЛИЕВ
