Еркеғали Рахмадиев атындағы Мемлекеттік академиялық филармонияның камералық хоры «Астана Опера» театрында қазақ композиторларының шығармашылығына және халық ән мұрасына негізделген «Жанымды тербеткен әуен» атты концерт өткізді.
Бұл концерттік бағдарлама бірнеше жыл бұрын үлкен сахнада қойылды. Осы жолы Ерболат Абылай аталмыш жобаға өңдеген жаңа туындылар енгізілді. Камералық хордың көркемдік жетекшісі, Қазақстанның еңбек сіңірген қайраткері, профессор Гүлмира Құттыбадамованың айтуынша, концерттің идеясы – жүректі тебірентетін ретро әндерді, ата-анамыздың жастық шағы, өзіміздің балалық шағымыз, халқымыз шырқайтын әндерді еске алу.
Кеш бағдарламасына ХХ ғасырдың танымал әндеріне айналған Т.Ізтаевтың «Нұрикамал», Н.Тілендиевтің «Куә бол», И.Жақановтың «Жайлаукөл кештері», М.Омаровтың «Анашым», Ә.Бейсеуовтің «Мұңайма» және «Ауылым», Ш.Қалдаяқов әндерінен және «Дос-Мұқасан» ансамблінің репертуарынан попурри, А.Зацепиннің «Мама», «Гүл Алматым» әндерінің хор өңдеулері еніп, алғаш рет орындалды.
