Қазақстан Республикасының Президентi Нұрсұлтан Назарбаевтың «Әлеуметтiк-экономикалық жаңғырту – Қазақстан дамуының басты бағыты» атты халыққа Жолдауында тiлдердi дамытуда ерекше бетбұрыс қажет екенi айтылды. Осы мақсатқа жету үшiн Астанадағы №18 «Аяжан» балабақшасының мектепалды қазақ-орыс топтарының тәрбиешiлерi Тiл комитетiнiң қолдауымен қазақ тiлiнде жарыққа шығарылған дыбыстық кiтапшаларды, күйтабаққа жазылған қазақ ертегiлерi мен қазақ әуендердi көптеп пайдаланады.
Жолдаудың жетiншi бағытында қазақ тiлiн жоғары деңгейге көтерiп, 2020 жылы мемлекеттiк тiлдi меңгергендердiң қатарын 95 пайызға жеткiзу жөнiнде айтылған. Демек, балабақшаға қабылданған балалар мектеп табалдырығын аттағанда қазақ тiлiнде сөйлей бiлуi тиiс. Олай болса, ана тiлiн меңгертуде бiздiң мекемемiздiң алдына да зор мақсаттар мен мiндеттер қойылуда.
Бұл бағытта балабақшамызда бiлiм-тәрбие мәселелерiн терең бiлетiн бiлiктi басшы, өзiнiң шебер ұйымдастырушылық қасиеттерiмен көпшiлiкке танымал болған мекеме меңгерушiсi Анна Жанахметованың жетекшiлiгiмен көптеген игi шаралар мен түрлi ертеңгiлiктер жиi ұйымдастырылып тұрады. Ал, олардың жоғары дәрежеде өтуiне тәрбиешi Салтанат Мәкенқызы Иманжанова, хореограф Жазира Манатпайқызы Бексұлтанова, ән-күй жетекшiсi Людмила Анатольевна Морозова және т.б. тәрбиешiлер өз үлестерiн қосып келедi.
Бүгiнгi таңда балабақшамызда 7 топ бар. Онда 2 жастан 6 жасқа дейiнгi 200-ге жуық бала тәрбиеленуде. Сонымен бiрге мұнда 20 педагог, 15 техникалық қызметкер жұмыс iстейдi. Тәрбиешiлердiң барлығы дерлiк жоғары бiлiмдi, жоғарғы және бiрiншi, екiншi санатты тәжiрибелi мамандар. Олар iздену, жаңалыққа ұмтылу – бүгiнгi күннiң талабы екенiн, жалпы, жаңалық өзiмiзден, өзiмiздiң iс-тәжiрибемiздi молайтудан басталатынын жақсы түсiнедi.
Жалпы, тағылымды тәрбиенiң тәлiмiн бала бойына қалыптастыру, жас ұрпақты отансүйгiштiкке, өз ұлтын құрметтеуге тәрбиелеу отбасынан және балабақшадан басталатынын ескерсек, бұл бағытта балалардың бойына адамгершiлiк, инабаттылық және iзеттiлiк қасиеттерiн қалыптастыруды басты мақсат еткен бiздiң педагогтар жаңа әдiстер мен тәсiлдердi қолдана отырып, жұмыс барысында инновациялық технологияларды терең меңгеруде.
Салтанат КЕРIМБЕКОВА,
№18 «Аяжан» балабақшасының әдiскерi
